dayar-e-ghair se ho kar dayar-e-yar jaega

dayār-e-ġhair se ho kar dayār-e-yār jā.egā

jahāñ se jab bhī koī sāhab-e-kirdār jā.egā

nafī kī kaj-adā.ī meñ nihāñ isbāt kā aalam

jahāñ iqrār na pahuñchā vahāñ inkār jā.egā

binā soche binā samjhe ye andhe saath ho leñge

kahīñ se to hamārā qāfila-sālār jā.egā

ḳhudī ke par nikal aa.eñ jo is mad.hosh insāñ meñ

to ye shahkār qudrat kā ufuq ke paar jā.egā

faqat aslāf ke kirdār par apnā amal ho to

kisī dushman kā bhī ho vaar vo be-kār jā.egā

ḳhudā se baḳhshvā degā kisī kā ek hī aañsū

kisī kā umr bhar ronā vahāñ be-kār jā.egā

bhale anjām jo bhī ho vahāñ bolūñgā maiñ 'anjum'

jahāñ ḳhāmosh rahne se mirā kirdār jā.egā

dayar-e-ghair se ho kar dayar-e-yar jaega

jahan se jab bhi koi sahab-e-kirdar jaega

nafi ki kaj-adai mein nihan isbaat ka aalam

jahan iqrar na pahuncha wahan inkar jaega

bina soche bina samjhe ye andhe sath ho lenge

kahin se to hamara qafila-salar jaega

KHudi ke par nikal aaen jo is madhosh insan mein

to ye shahkar qudrat ka ufuq ke par jaega

faqat aslaf ke kirdar par apna amal ho to

kisi dushman ka bhi ho war wo be-kar jaega

KHuda se baKHshwa dega kisi ka ek hi aansu

kisi ka umr bhar rona wahan be-kar jaega

bhale anjam jo bhi ho wahan bolunga main 'anjum'

jahan KHamosh rahne se mera kirdar jaega