dayar-e-husn mein pabandi-e-rasm-e-wafa kam hai

dayār-e-husn meñ pābandī-e-rasm-e-vafā kam hai

bahut kam hai bahut kam hai ba-hadd-e-intihā kam hai

jafā-e-be-sabab kam hai ki jaur-e-nā-ravā kam hai

tirī be-dād ai zālim na hone par bhī kyā kam hai

kamāl-e-dilbarī meñ kaun sī terī adā kam hai

na shoḳhī kam hayā se hai na shoḳhī se hayā kam hai

ba-kasrat sair kī hai har ravish gulzār-e-ālam kī

yahāñ rang-e-mohabbat hai bahut bū-e-vafā kam hai

ḳhudā ke naam par dast-o-girebāñ haiñ ḳhudā vaale

bahut hai jis qadar zikr-e-ḳhudā ḳhauf-e-ḳhudā kam hai

azal se hotī aa.ī hai abad tak hotī jā.egī

gunahgār-e-vafā par jis qadar bhī ho jafā kam hai

duā ko haath kyuuñ uTThe mire tīmār-dāroñ ke

zabāñ se kyuuñ nahīñ kahte ki ummīd-e-shafā kam hai

rahe kyūñkar na bad-zan vo shah-e-husn ai 'vafā' mujh se

baḌā nādān hai suntā bahut hai dekhtā kam hai

dayar-e-husn mein pabandi-e-rasm-e-wafa kam hai

bahut kam hai bahut kam hai ba-hadd-e-intiha kam hai

jafa-e-be-sabab kam hai ki jaur-e-na-rawa kam hai

teri be-dad ai zalim na hone par bhi kya kam hai

kamal-e-dilbari mein kaun si teri ada kam hai

na shoKHi kam haya se hai na shoKHi se haya kam hai

ba-kasrat sair ki hai har rawish gulzar-e-alam ki

yahan rang-e-mohabbat hai bahut bu-e-wafa kam hai

KHuda ke nam par dast-o-gireban hain KHuda wale

bahut hai jis qadar zikr-e-KHuda KHauf-e-KHuda kam hai

azal se hoti aai hai abad tak hoti jaegi

gunahgar-e-wafa par jis qadar bhi ho jafa kam hai

dua ko hath kyun uTThe mere timar-daron ke

zaban se kyun nahin kahte ki ummid-e-shafa kam hai

rahe kyunkar na bad-zan wo shah-e-husn ai 'wafa' mujh se

baDa nadan hai sunta bahut hai dekhta kam hai