dayar-e-shauq mein koson kahin hawa bhi nahin

dayār-e-shauq meñ kosoñ kahīñ havā bhī nahīñ

umas hai aisā ki patta koī hilā bhī nahīñ

ḳhafā nahīñ hai magar is adā ko kyā kahiye

pukārtā huuñ to vo muḌ ke dekhtā bhī nahīñ

ye kis maqām pe tanhā.ī sauñpte ho mujhe

ki ab to tark-e-tamannā kā hausla bhī nahīñ

baḌā gila hai dil-e-ġham-parast ko tum se

vo dard us ko diyā hai jo lā-davā bhī nahīñ

kahāñ talāsh kareñ juz tire sukūn-e-nazar

ki is jahāñ meñ koī tujh sā dūsrā bhī nahīñ

basā huā hai mire dil meñ bū-e-gul kī tarah

vo duur duur hai mujh se magar judā bhī nahīñ

kise sunāoge tum muzhda-e-sahar 'nāsir'

vo rat-jage hue ab koī jāgtā bhī nahīñ

dayar-e-shauq mein koson kahin hawa bhi nahin

umas hai aisa ki patta koi hila bhi nahin

KHafa nahin hai magar is ada ko kya kahiye

pukarta hun to wo muD ke dekhta bhi nahin

ye kis maqam pe tanhai saunpte ho mujhe

ki ab to tark-e-tamanna ka hausla bhi nahin

baDa gila hai dil-e-gham-parast ko tum se

wo dard us ko diya hai jo la-dawa bhi nahin

kahan talash karen juz tere sukun-e-nazar

ki is jahan mein koi tujh sa dusra bhi nahin

basa hua hai mere dil mein bu-e-gul ki tarah

wo dur dur hai mujh se magar juda bhi nahin

kise sunaoge tum muzhda-e-sahar 'nasir'

wo rat-jage hue ab koi jagta bhi nahin