دیار شوق میں مجھ کو غم سود و زیاں کیوں ہو

دیار شوق میں مجھ کو غم سود و زیاں کیوں ہو

جو لٹ جائے نہ راہوں میں وہ میرا کارواں کیوں ہو

تعلق ترک کر کے بھی میرے دل میں نہاں کیوں ہو

مجھے آزار جاں دے کر میرا روح رواں کیوں ہو

اسے چاہوں اسے چاہوں جسے چاہوں کسی کو کیا

زمانہ مجھ سے کیوں الجھے زمانہ بد نما کیوں ہو

نظر چہرے پہ ڈالی ہے مگر کچھ سہمی سہمی سی

حسینوں کا یہ رعب حسن ان کا پاسباں کیوں ہو

وہی ہے کیف و سرمستی وہی لطف اور لذت ہے

جہاں تیرا تصور ہے مئے رنگیں وہاں کیوں ہو

جہاں شعلوں سے پھولوں کے حسیں چہرے جھلستے ہیں

جہاں کانٹے پنپتے ہیں وہ میرا گلستاں کیوں ہو

لب گل پر تمہیں خنداں میرے دل میں تمہیں رقصاں

عیاں ہو اس قدر جب تم تو آنکھوں سے نہاں کیوں ہو

حبیبؔ اب پیار کی وہ چاندنی راتیں نہیں باقی

تو اس پہلی نظر کی یاد بھی دل میں نہاں کیوں ہو