dayar-e-shauq mein mujhko gham-e-sud-o-ziyan kyon ho

dayār-e-shauq meñ mujh ko ġham-e-sūd-o-ziyāñ kyoñ ho

jo luT jaa.e na rāhoñ meñ vo merā kārvāñ kyoñ ho

ta'alluq tark kar ke bhī mere dil meñ nihāñ kyoñ ho

mujhe āzār-e-jāñ de kar merā rūh-e-ravāñ kyoñ ho

ise chāhūñ use chāhūñ jise chāhūñ kisī ko kyā

zamāna mujh se kyoñ uljhe zamāna bad-numā kyoñ ho

nazar chehre pe Daalī hai magar kuchh sahmī sahmī sī

hasīnoñ kā ye ro'b-e-husn un kā pāsbāñ kyoñ ho

vahī hai kaif-o-sarmastī vahī lutf aur lazzat hai

jahāñ terā tasavvur hai mai-e-rañgīñ vahāñ kyoñ ho

jahāñ sho'loñ se phūloñ ke hasīñ chehre jhulaste haiñ

jahāñ kāñTe panapte haiñ vo merā gulsitāñ kyoñ ho

lab-e-gul par tumhīñ ḳhandāñ mere dil meñ tumhīñ raqsāñ

ayaañ ho is qadar jab tum to āñkhoñ se nihāñ kyoñ ho

'habīb' ab pyaar kī vo chāñdnī rāteñ nahīñ baaqī

to us pahlī nazar kī yaad bhī dil meñ nihāñ kyoñ ho

dayar-e-shauq mein mujh ko gham-e-sud-o-ziyan kyon ho

jo luT jae na rahon mein wo mera karwan kyon ho

ta'alluq tark kar ke bhi mere dil mein nihan kyon ho

mujhe aazar-e-jaan de kar mera ruh-e-rawan kyon ho

ise chahun use chahun jise chahun kisi ko kya

zamana mujh se kyon uljhe zamana bad-numa kyon ho

nazar chehre pe Dali hai magar kuchh sahmi sahmi si

hasinon ka ye ro'b-e-husn un ka pasban kyon ho

wahi hai kaif-o-sarmasti wahi lutf aur lazzat hai

jahan tera tasawwur hai mai-e-rangin wahan kyon ho

jahan sho'lon se phulon ke hasin chehre jhulaste hain

jahan kanTe panapte hain wo mera gulsitan kyon ho

lab-e-gul par tumhin KHandan mere dil mein tumhin raqsan

ayan ho is qadar jab tum to aankhon se nihan kyon ho

'habib' ab pyar ki wo chandni raaten nahin baqi

to us pahli nazar ki yaad bhi dil mein nihan kyon ho