de chuke dil to phir ab dil par ijara kaisa

de chuke dil to phir ab dil par ijārā kaisā

ham samajhte haiñ hamārā hai hamārā kaisā

har adā bāñkī hai har naaz se pyārā kaisā

dil meñ rakh lījiye andāz hai saarā kaisā

surḳh poshāk vo pahneñge ḳhudā ḳhair kare

aaj mirrīḳh kā chamkegā sitārā kaisā

mujh ko ye lutf ki vo shart meñ bose jiite

un ko ye sharm ki maiñ jiit meñ haarā kaisā

mardum-e-chashm ne palkoñ se balā.eñ le liiñ

chashm-e-baddūr hai vo aañkh kā taarā kaisā

maiñ liye jā.ūñ shab-e-vasl mukarrar bose

tum kahe jaao ki haiñ haiñ ye dobārā kaisā

dam-e-nazzāra nazar-bāz taḌap jaate haiñ

shoḳhī-e-chashm se hai shoḳh ishāra kaisā

tujh pe marte haiñ tire va.adoñ pe ham jiite haiñ

ḳhālī bātoñ kā bhī hotā hai sahārā kaisā

saaf āġhosh-e-tamannā se nikal jaate ho

vasl meñ vasl se karte ho kinārā kaisā

de chuke dil to phir ab dil par ijara kaisa

hum samajhte hain hamara hai hamara kaisa

har ada banki hai har naz se pyara kaisa

dil mein rakh lijiye andaz hai sara kaisa

surKH poshak wo pahnenge KHuda KHair kare

aaj mirriKH ka chamkega sitara kaisa

mujh ko ye lutf ki wo shart mein bose jite

un ko ye sharm ki main jit mein haara kaisa

mardum-e-chashm ne palkon se balaen le lin

chashm-e-baddur hai wo aankh ka tara kaisa

main liye jaun shab-e-wasl mukarrar bose

tum kahe jao ki hain hain ye dobara kaisa

dam-e-nazzara nazar-baz taDap jate hain

shoKHi-e-chashm se hai shoKH ishaara kaisa

tujh pe marte hain tere wadon pe hum jite hain

KHali baaton ka bhi hota hai sahaara kaisa

saf aaghosh-e-tamanna se nikal jate ho

wasl mein wasl se karte ho kinara kaisa