de mohabbat to mohabbat mein asar paida kar

de mohabbat to mohabbat meñ asar paidā kar

jo idhar dil meñ hai yā rab vo udhar paidā kar

dūd-e-dil ishq meñ itnā to asar paidā kar

sar kaTe sham.a kī mānind to sar paidā kar

phir hamārā dil-e-gum-gashta bhī mil jā.egā

pahle tū apnā dahan apnī kamar paidā kar

kaam lene haiñ mohabbat meñ bahut se yā rab

aur dil de hameñ ik aur jigar paidā kar

tham zarā ai adam-ābād ke jaane vaale

rah ke duniyā meñ abhī zād-e-safar paidā kar

jhuuT jab bolte haiñ vo to duā hotī hai

yā ilāhī mirī bātoñ meñ asar paidā kar

ā.īna dekhnā is husn pe āsān nahīñ

pesh-tar aañkh mirī merī nazar paidā kar

sub.h-e-furqat to qayāmat kī sahar hai yā rab

apne bandoñ ke liye aur sahar paidā kar

mujh ko rotā huā dekheñ to jhulas jaa.eñ raqīb

aag paanī meñ bhī ai soz-e-jigar paidā kar

miT ke bhī dūri-e-gulshan nahīñ bhātī yā rab

apnī qudrat se mirī ḳhaak meñ par paidā kar

shikva-e-dard-e-judā.ī pe vo farmāte haiñ

ranj sahne ko hamārā sā jigar paidā kar

din nikalne ko hai rāhat se guzar jaane de

ruuTh kar tū na qayāmat kī sahar paidā kar

ham ne dekhā hai ki mil jaate haiñ laḌne vaale

sulh kī ḳhū bhī to ai bāni-e-shar paidā kar

mujh se ghar aane ke vaade par bigaḌ kar bole

kah diyā ġhair ke dil meñ abhī ghar paidā kar

mujh se kahtī hai kaḌak kar ye kamāñ qātil kī

tiir ban jaa.e nishāna vo jigar paidā kar

kyā qayāmat meñ bhī parda na uThegā ruḳh se

ab to merī shab-e-yaldā kī sahar paidā kar

dekhnā khel nahīñ jalva-e-dīdār tirā

pahle muusā sā koī ahl-e-nazar paidā kar

dil meñ bhī miltā hai vo kaaba bhī us kā hai maqām

raah nazdīk kī ai azm-e-safar paidā kar

zof kā hukm ye hai hoñT na hilne paa.eñ

dil ye kahtā hai ki naale meñ asar paidā kar

naale 'beḳhud' ke qayāmat haiñ tujhe yaad rahe

zulm karnā hai to patthar kā jigar paidā kar

de mohabbat to mohabbat mein asar paida kar

jo idhar dil mein hai ya rab wo udhar paida kar

dud-e-dil ishq mein itna to asar paida kar

sar kaTe shama ki manind to sar paida kar

phir hamara dil-e-gum-gashta bhi mil jaega

pahle tu apna dahan apni kamar paida kar

kaam lene hain mohabbat mein bahut se ya rab

aur dil de hamein ek aur jigar paida kar

tham zara ai adam-abaad ke jaane wale

rah ke duniya mein abhi zad-e-safar paida kar

jhuT jab bolte hain wo to dua hoti hai

ya ilahi meri baaton mein asar paida kar

aaina dekhna is husn pe aasan nahin

pesh-tar aankh meri meri nazar paida kar

subh-e-furqat to qayamat ki sahar hai ya rab

apne bandon ke liye aur sahar paida kar

mujh ko rota hua dekhen to jhulas jaen raqib

aag pani mein bhi ai soz-e-jigar paida kar

miT ke bhi duri-e-gulshan nahin bhati ya rab

apni qudrat se meri KHak mein par paida kar

shikwa-e-dard-e-judai pe wo farmate hain

ranj sahne ko hamara sa jigar paida kar

din nikalne ko hai rahat se guzar jaane de

ruTh kar tu na qayamat ki sahar paida kar

hum ne dekha hai ki mil jate hain laDne wale

sulh ki KHu bhi to ai bani-e-shar paida kar

mujh se ghar aane ke wade par bigaD kar bole

kah diya ghair ke dil mein abhi ghar paida kar

mujh se kahti hai kaDak kar ye kaman qatil ki

tir ban jae nishana wo jigar paida kar

kya qayamat mein bhi parda na uThega ruKH se

ab to meri shab-e-yalda ki sahar paida kar

dekhna khel nahin jalwa-e-didar tera

pahle musa sa koi ahl-e-nazar paida kar

dil mein bhi milta hai wo kaba bhi us ka hai maqam

rah nazdik ki ai azm-e-safar paida kar

zof ka hukm ye hai honT na hilne paen

dil ye kahta hai ki nale mein asar paida kar

nale 'beKHud' ke qayamat hain tujhe yaad rahe

zulm karna hai to patthar ka jigar paida kar