dekh kar baam-o-dar ka sannaTa

dekh kar bām-o-dar kā sannāTā

bol uThtā hai ghar kā sannāTā

ai mohabbat ik āḳhirī āvāz

phir to hai umr bhar kā sannāTā

koī sūrat na koī ā.īna

dīdanī hai nazar kā sannāTā

likh rahī hai sahar ke māthe par

raat apne safar kā sannāTā

kyā yahī hai uḌaan kā mausam

aam hai bāl-o-par kā sannāTā

kis ko āvāz de musāfir-e-ġham

be-jahat hai safar kā sannāTā

āsmāñ par hai āḳhirī taarā

dam-ba-ḳhud hai sahar kā sannāTā

ho na ho koī aane vaalā hai

kah rahā hai ye ghar kā sannāTā

chaap qadmoñ kī bhī nahīñ hai 'ziyā'

ham haiñ aur rahguzar kā sannāTā

dekh kar baam-o-dar ka sannaTa

bol uThta hai ghar ka sannaTa

ai mohabbat ek aaKHiri aawaz

phir to hai umr bhar ka sannaTa

koi surat na koi aaina

didani hai nazar ka sannaTa

likh rahi hai sahar ke mathe par

raat apne safar ka sannaTa

kya yahi hai uDan ka mausam

aam hai baal-o-par ka sannaTa

kis ko aawaz de musafir-e-gham

be-jahat hai safar ka sannaTa

aasman par hai aaKHiri tara

dam-ba-KHud hai sahar ka sannaTa

ho na ho koi aane wala hai

kah raha hai ye ghar ka sannaTa

chap qadmon ki bhi nahin hai 'ziya'

hum hain aur rahguzar ka sannaTa