dekh kar joban tera kis kis ko hairani hui

dekh kar joban tirā kis kis ko hairānī huī

is javānī par javānī aap dīvānī huī

parde parde meñ mohabbat dushman-e-jānī huī

ye ḳhudā kī maar kyā ai shauq-e-pinhānī huī

dil kā saudā kar ke un se kyā pashemānī huī

qadr us kī phir kahāñ jis shai kī arzānī huī

mere ghar us shoḳh kī do din se mehmānī huī

bekasī kī aaj kal kyā ḳhāna-vīrānī huī

tark-e-rasm-o-rāh par afsos hai donoñ taraf

ham se nādānī huī yā tum se nādānī huī

ibtidā se intihā tak haal un se kah to duuñ

fikr ye hai aur jo kah kar pashemānī huī

ġham qayāmat kā nahīñ vā'iz mujhe ye fikr hai

diin kab baaqī rahā duniyā agar faanī huī

tum na shab ko aaoge ye hai yaqīñ aayā huā

tum na mānoge mirī ye baat hai maanī huī

mujh meñ dam jab tak rahā mushkil meñ the tīmārdār

merī āsānī se sab yāroñ kī āsānī huī

is ko kyā kahte haiñ utnā hī baḌhā shauq-e-visāl

jis qadar mash.hūr un kī pāk-dāmānī huī

bazm se uThne kī ġhairat baiThne se dil ko rashk

dekh kar ġhairoñ kā majma.a kyā pareshānī huī

dāva-e-tasḳhīr par ye us parī-vash ne kahā

aap kā dil kyā huā mohr-e-sulemānī huī

khul ga.iiñ zulfeñ magar us shoḳh mast-e-nāz kī

jhūmtī bād-e-sabā phirtī hai mastānī huī

maiñ sarāpā sajde kartā us ke dar par shauq se

sar se pā tak kyuuñ na peshānī hī peshānī huī

dil kī qalb-e-māhiyat kā ho use kyūñkar yaqīñ

kab havā miTTī huī hai aag kab paanī huī

aate hī kahte ho ab ghar jā.eñge achchhī kahī

ye masal puurī yahāñ man-mānī ghar jaanī huī

arsa-e-mahshar meñ tujh ko DhūñD lā.ūñ to sahī

koī chhup saktī hai jo sūrat ho pahchānī huī

dekh kar qātil kā ḳhālī haath bhī jī Dar gayā

us kī chīn-e-āstīñ bhī chīn-e-peshānī huī

khā ke dhokā us but-e-kamsin ne dāman meñ liye

ashk-afshānī bhī merī gauhar-afshānī huī

bekasī par merī apnī teġh kī hasrat to dekh

chashm-e-jauhar bhī ba-shakl-e-chashm-e-hairānī huī

bekasī par 'dāġh' kī afsos aatā hai hameñ

kis jagah kis vaqt us kī ḳhāna-vīrānī huī

dekh kar joban tera kis kis ko hairani hui

is jawani par jawani aap diwani hui

parde parde mein mohabbat dushman-e-jaani hui

ye KHuda ki mar kya ai shauq-e-pinhani hui

dil ka sauda kar ke un se kya pashemani hui

qadr us ki phir kahan jis shai ki arzani hui

mere ghar us shoKH ki do din se mehmani hui

bekasi ki aaj kal kya KHana-virani hui

tark-e-rasm-o-rah par afsos hai donon taraf

hum se nadani hui ya tum se nadani hui

ibtida se intiha tak haal un se kah to dun

fikr ye hai aur jo kah kar pashemani hui

gham qayamat ka nahin wa'iz mujhe ye fikr hai

din kab baqi raha duniya agar fani hui

tum na shab ko aaoge ye hai yaqin aaya hua

tum na manoge meri ye baat hai mani hui

mujh mein dam jab tak raha mushkil mein the timardar

meri aasani se sab yaron ki aasani hui

is ko kya kahte hain utna hi baDha shauq-e-visal

jis qadar mashhur un ki pak-damani hui

bazm se uThne ki ghairat baiThne se dil ko rashk

dekh kar ghairon ka majma kya pareshani hui

dawa-e-tasKHir par ye us pari-wash ne kaha

aap ka dil kya hua mohr-e-sulemani hui

khul gain zulfen magar us shoKH mast-e-naz ki

jhumti baad-e-saba phirti hai mastani hui

main sarapa sajde karta us ke dar par shauq se

sar se pa tak kyun na peshani hi peshani hui

dil ki qalb-e-mahiyat ka ho use kyunkar yaqin

kab hawa miTTi hui hai aag kab pani hui

aate hi kahte ho ab ghar jaenge achchhi kahi

ye masal puri yahan man-mani ghar jaani hui

arsa-e-mahshar mein tujh ko DhunD laun to sahi

koi chhup sakti hai jo surat ho pahchani hui

dekh kar qatil ka KHali hath bhi ji Dar gaya

us ki chin-e-astin bhi chin-e-peshani hui

kha ke dhoka us but-e-kamsin ne daman mein liye

ashk-afshani bhi meri gauhar-afshani hui

bekasi par meri apni tegh ki hasrat to dekh

chashm-e-jauhar bhi ba-shakl-e-chashm-e-hairani hui

bekasi par 'dagh' ki afsos aata hai hamein

kis jagah kis waqt us ki KHana-virani hui