dekh kar kurti gale mein sabz dhani aap ki

dekh kar kurtī gale meñ sabz dhānī aap kī

dhaan ke bhī khet ne ab aan maanī aap kī

kyā ta.ajjub hai agar dekhe to murda jī uThe

chain nefe kī Dhalak peḌū pe aanī aap kī

ham to kyā haiñ dil farishte kā bhī kāfir chhīn le

Tuk jhalak dikhlā ke phir añgiyā chhupānī aap kī

aa paḌe do sau baras ke murda-be-e-jāñ meñ jaan

jis ke uupar do ghaḌī ho mehrbānī aap kī

chhalle ġhairoñ paas to vo ḳhātam-e-zar ai nigār

hai hamāre paas bhī ab tak nishānī aap kī

vaqt to jaatā rahā par baat baaqī rah ga.ī

hai ye jhūTī dostī ab ham ne jaanī aap kī

kyā ajab sūrat raqīb-e-rū-siyah kī dekh kar

ḳhauf se hālat huī ho paanī paanī aap kī

ek aalam kohkan kī tarah sar phoḌegā ab

gar isī sūrat rahī shīrīñ-zabānī aap kī

kyā hameñ lagtī hai pyārī jab vo kahtī hai 'nazīr'

hai miyāñ kuchh in dinoñ nā-mehrbānī aap kī

dekh kar kurti gale mein sabz dhani aap ki

dhan ke bhi khet ne ab aan mani aap ki

kya tajjub hai agar dekhe to murda ji uThe

chain nefe ki Dhalak peDu pe aani aap ki

hum to kya hain dil farishte ka bhi kafir chhin le

Tuk jhalak dikhla ke phir angiya chhupani aap ki

aa paDe do sau baras ke murda-be-e-jaan mein jaan

jis ke upar do ghaDi ho mehrbani aap ki

chhalle ghairon pas to wo KHatam-e-zar ai nigar

hai hamare pas bhi ab tak nishani aap ki

waqt to jata raha par baat baqi rah gai

hai ye jhuTi dosti ab hum ne jaani aap ki

kya ajab surat raqib-e-ru-siyah ki dekh kar

KHauf se haalat hui ho pani pani aap ki

ek aalam kohkan ki tarah sar phoDega ab

gar isi surat rahi shirin-zabani aap ki

kya hamein lagti hai pyari jab wo kahti hai 'nazir'

hai miyan kuchh in dinon na-mehrbani aap ki