dekh kar rang-e-hina jaan fana hoti hai

dekh kar rang-e-hinā jaan fanā hotī hai

kyā hasīnoñ kī hī muTThī meñ qazā hotī hai

apne bismil kī taḌap dekh tū us dam qātil

jab tirī teġh gale mil ke judā hotī hai

tire qurbān na jā baaġh meñ juuḌā khole

paanī paanī tire bāloñ se ghaTā hotī hai

ġhair to ġhair haiñ ahbāb badal jaate haiñ

haa.e bigḌī huī taqdīr bhī kyā hotī hai

is rah-e-saḳht meñ paañv kā hai rakhnā mushkil

kis se tai manzil-e-taslīm-o-razā hotī hai

duur se bhī use sunñā na kabhī o shah-e-husn

ki asar-ḳhez faqīroñ kī sadā hotī hai

aur taḌpāte ho dil de ke tasallī dil ko

ḳhuub bīmār-e-mohabbat kī davā hotī hai

daaġh bhī dil ke miTe dil kī umīdeñ bhī miTīñ

tirī hasrat bhī gale mil ke judā hotī hai

mil hī jaate haiñ nasīboñ se na milne vaale

ye bhī hotā hai jo taqdīr-e-rasā hotī hai

ye to kyūñkar kahūñ armān nikal jaate haiñ

aap milte haiñ to taskīn zarā hotī hai

fasl-e-gul se bhī hai dilchasp javānī kī bahār

gul na.e khilte haiñ jab tez havā hotī hai

haath zālim ne sū-e-charḳh uThā.e 'safdar'

le mubārak tire marne kī duā hotī hai

dekh kar rang-e-hina jaan fana hoti hai

kya hasinon ki hi muTThi mein qaza hoti hai

apne bismil ki taDap dekh tu us dam qatil

jab teri tegh gale mil ke juda hoti hai

tere qurban na ja bagh mein juDa khole

pani pani tere baalon se ghaTa hoti hai

ghair to ghair hain ahbab badal jate hain

hae bigDi hui taqdir bhi kya hoti hai

is rah-e-saKHt mein panw ka hai rakhna mushkil

kis se tai manzil-e-taslim-o-raza hoti hai

dur se bhi use sunna na kabhi o shah-e-husn

ki asar-KHez faqiron ki sada hoti hai

aur taDpate ho dil de ke tasalli dil ko

KHub bimar-e-mohabbat ki dawa hoti hai

dagh bhi dil ke miTe dil ki umiden bhi miTin

teri hasrat bhi gale mil ke juda hoti hai

mil hi jate hain nasibon se na milne wale

ye bhi hota hai jo taqdir-e-rasa hoti hai

ye to kyunkar kahun arman nikal jate hain

aap milte hain to taskin zara hoti hai

fasl-e-gul se bhi hai dilchasp jawani ki bahaar

gul nae khilte hain jab tez hawa hoti hai

hath zalim ne su-e-charKH uThae 'safdar'

le mubarak tere marne ki dua hoti hai