دیکھ کر اس کو کبھی شاد ہوا کرتے تھے

دیکھ کر اس کو کبھی شاد ہوا کرتے تھے

ان دنوں ہم بھی اسے یاد ہوا کرتے تھے

آپ نے یار محبت میں کمائی کر لی

لوگ تو عشق میں برباد ہوا کرتے تھے

اک محبت کی فضا چاروں طرف ہوتی تھی

آسماں زادے زمیں زاد ہوا کرتے تھے

ترے ہوتے ہوئے خاموش سبھی رہتے تھے

سارے ہنگامے ترے بعد ہوا کرتے تھے

ان کی آواز ہی تحریک بنا کرتی تھی

لوگ جب مائل فریاد ہوا کرتے تھے

اب تو ہر حکم پہ ہم سر کو جھکا لیتے ہیں

ہم جو مجموعۂ ازداد ہوا کرتے تھے

وقت بدلے تو پھر انہونی بھی ہو جاتی ہے

آج جو صید ہیں صیاد ہوا کرتے تھے