dekh kar usko kabhi shad hua karte the

dekh kar us ko kabhī shaad huā karte the

un dinoñ ham bhī use yaad huā karte the

aap ne yaar mohabbat meñ kamā.ī kar lī

log to 'ishq meñ barbād huā karte the

ik mohabbat kī fazā chāroñ taraf hotī thī

āsmāñ-zāde zamīñ-zād huā karte the

tire hote hue ḳhāmosh sabhī rahte the

saare hañgāme tire baa'd huā karte the

un kī āvāz hī tahrīk banā kartī thī

log jab mā.il-e-fariyād huā karte the

ab to har hukm pe ham sar ko jhukā lete haiñ

ham jo majmū'a-e-azdād huā karte the

vaqt badle to phir anhonī bhī ho jaatī hai

aaj jo said haiñ sayyād huā karte the

dekh kar us ko kabhi shad hua karte the

un dinon hum bhi use yaad hua karte the

aap ne yar mohabbat mein kamai kar li

log to 'ishq mein barbaad hua karte the

ek mohabbat ki faza chaaron taraf hoti thi

aasman-zade zamin-zad hua karte the

tere hote hue KHamosh sabhi rahte the

sare hangame tere ba'd hua karte the

un ki aawaz hi tahrik bana karti thi

log jab mail-e-fariyaad hua karte the

ab to har hukm pe hum sar ko jhuka lete hain

hum jo majmu'a-e-azdad hua karte the

waqt badle to phir anhoni bhi ho jati hai

aaj jo said hain sayyaad hua karte the