dekh kar uThta hua shauq ka sar yani tu

dekh kar uThtā huā shauq kā sar ya.anī tū

kaaT Dālegā mirā dast-e-hunar ya.anī to

merī taqdīr meñ likkhegā añdheroñ kā sukūt

rauñd Dālegā mirī taaza sahar ya.anī to

bas yahī hai mire dāmān-e-safar meñ ab to

merī manzil hai mirī rāhguzar ya.anī tū

jab bhī aa.egā savā neze pe ḳhurshīd-e-ġhazab

phūlne-phalne nahīñ degā shajar ya.anī tū

mujh ko ma.alūm hai ai dost uThā letā hai

mere hisse ke sabhī barg-o-samar ya.anī tū

tere tevar ye batāte haiñ ai jaane vaale

lauT ke ab na kabhī aa.egā ghar ya.anī tū

ye guzārish hai mirī tujh se guzārish merī

merī nas nas meñ utar tū hī utar ya.anī tū

ḳhushbū-e-gul kī tarah rañg-e-shafaq kī sūrat

dil ke āñgan meñ bikhar aur bikhar ya.anī tū

nikhrā nikhrā sā hai ummīd kā mausam yuuñ bhī

shāḳh-e-ummīd pe kuchh aur sañvar aur sañvar ya.anī tū

rāh-e-ulfat meñ mujhe terī qasam jān-e-'nabīl'

hai mire pesh-e-nazar pesh-e-nazar ya.anī tū

dekh kar uThta hua shauq ka sar yani tu

kaT Dalega mera dast-e-hunar yani to

meri taqdir mein likkhega andheron ka sukut

raund Dalega meri taza sahar yani to

bas yahi hai mere daman-e-safar mein ab to

meri manzil hai meri rahguzar yani tu

jab bhi aaega sawa neze pe KHurshid-e-ghazab

phulne-phalne nahin dega shajar yani tu

mujh ko malum hai ai dost uTha leta hai

mere hisse ke sabhi barg-o-samar yani tu

tere tewar ye batate hain ai jaane wale

lauT ke ab na kabhi aaega ghar yani tu

ye guzarish hai meri tujh se guzarish meri

meri nas nas mein utar tu hi utar yani tu

KHushbu-e-gul ki tarah rang-e-shafaq ki surat

dil ke aangan mein bikhar aur bikhar yani tu

nikhra nikhra sa hai ummid ka mausam yun bhi

shaKH-e-ummid pe kuchh aur sanwar aur sanwar yani tu

rah-e-ulfat mein mujhe teri qasam jaan-e-'nabil'

hai mere pesh-e-nazar pesh-e-nazar yani tu