dekh ke tujhko main dekhta rah gaya

dekh ke tujh ko maiñ dekhtā rah gayā

ishq karne ko ab kyā bachā rah gayā

chāñd kyā hai sanam aap ke sāmne

husn ye dekh kar sochtā rah gayā

ḳhvāb āñkhoñ se mere guzarte ga.e

niiñd meñ bhī tujhe sochtā rah gayā

mujh ko tere sivā kuchh nahīñ chāhiye

so maiñ rab se tujhe māñgtā rah gayā

ruuTh jaatī ho par lauT aatī ho tum

is liye maiñ tumheñ chāhtā rah gayā

terī āġhosh jannat se kam bhī nahīñ

is liye maiñ ḳhudā se judā rah gayā

husn par miTne vaalā maiñ āshiq nahīñ

umr bhar maiñ jabīñ chūmtā rah gayā

vasl kī yaad marham banī is liye

hijr ke ba.ad bhī hausla rah gayā

dekh ke tujh ko main dekhta rah gaya

ishq karne ko ab kya bacha rah gaya

chand kya hai sanam aap ke samne

husn ye dekh kar sochta rah gaya

KHwab aankhon se mere guzarte gae

nind mein bhi tujhe sochta rah gaya

mujh ko tere siwa kuchh nahin chahiye

so main rab se tujhe mangta rah gaya

ruTh jati ho par lauT aati ho tum

is liye main tumhein chahta rah gaya

teri aaghosh jannat se kam bhi nahin

is liye main KHuda se juda rah gaya

husn par miTne wala main aashiq nahin

umr bhar main jabin chumta rah gaya

wasl ki yaad marham bani is liye

hijr ke baad bhi hausla rah gaya