dekh le KHud hi koi lauT ke jate hue hath

dekh le ḳhud hī koī lauT ke jaate hue haath

sharm aatī hai zarā ham ko baḌhāte hue haath

kyā ḳhabar tum ko ki kyā dil pe guzartī hai mire

jin se dil miltā nahīñ un se milāte hue haath

tujh ko bāñhoñ meñ bharūñ chhoḌ ke jaane vaale

tujh ko ruḳhsat bhī karūñ haa.e hilāte hue haath

us ne barfāb se hāthoñ se jo thāmā mujh ko

mere gāloñ pe lagī aag lagāte hue haath

sab ne dekhā thā faqat ham ko bichhaḌte lamhe

rab ne dekhā thā hameñ saath uThāte hue haath

ham ne pakḌā nahīñ bohtān-zabānoñ ko kabhī

ham ne toḌe hī nahīñ uñglī uThāte hue haath

jab kiyā ġhaur kabhī ḳhud kī zabūñ-hālī par

jism kī samt baḌhe saa.e se aate hue haath

girte dushman ko bhī ham jhaT se uThā lete haiñ

ham se rukte hī nahīñ haath baḌhāte hue haath

us kā shīsha sā badan aur maiñ patthar 'ārif'

Dar to lagtā hai zarā us ko lagāte hue haath

dekh le KHud hi koi lauT ke jate hue hath

sharm aati hai zara hum ko baDhate hue hath

kya KHabar tum ko ki kya dil pe guzarti hai mere

jin se dil milta nahin un se milate hue hath

tujh ko banhon mein bharun chhoD ke jaane wale

tujh ko ruKHsat bhi karun hae hilate hue hath

us ne barfab se hathon se jo thama mujh ko

mere galon pe lagi aag lagate hue hath

sab ne dekha tha faqat hum ko bichhaDte lamhe

rab ne dekha tha hamein sath uThate hue hath

hum ne pakDa nahin bohtan-zabanon ko kabhi

hum ne toDe hi nahin ungli uThate hue hath

jab kiya ghaur kabhi KHud ki zabun-haali par

jism ki samt baDhe sae se aate hue hath

girte dushman ko bhi hum jhaT se uTha lete hain

hum se rukte hi nahin hath baDhate hue hath

us ka shisha sa badan aur main patthar 'arif'

Dar to lagta hai zara us ko lagate hue hath