dekh leta hun to phir aankh chhalak jati hai

dekh letā huuñ to phir aañkh chhalak jaatī hai

terī bastī kī taraf jo bhī saḌak jaatī hai

rūThne lagtī hai jab mujh se mohabbat merī

mere baazū se ye tā'vīz khisak jaatī hai

tanz kyoñ kartī hai is TeḌhī kamar par duniyā

bojh bhārī ho to har shāḳh lachak jaatī hai

ret jaise hameñ lagne lage saare rishte

ret hāthoñ se uThāo to sarak jaatī hai

jab bhī suntī hai vo anjām-e-vafā ke qisse

ek laḌkī mirī godī meñ dubak jaatī hai

mo'jiza bhī tire bose kā 'ajab hai ai maañ

chuum letī hai to taqdīr chamak jaatī hai

'ishq meñ log bahak jaa.eñ to hairat kaisī

bin payambar ke to ummat bhī bahak jaatī hai

aise bhaTkā huuñ tirī yaad ke sahrāoñ meñ

jaise bachchī kisī mele meñ bhaTak jaatī hai

ḳharch itnā bhī na ashkoñ ko kiyā kar ai 'dil'

Dher ro dene se ye aañkh chipak jaatī hai

dekh leta hun to phir aankh chhalak jati hai

teri basti ki taraf jo bhi saDak jati hai

ruThne lagti hai jab mujh se mohabbat meri

mere bazu se ye ta'wiz khisak jati hai

tanz kyon karti hai is TeDhi kamar par duniya

bojh bhaari ho to har shaKH lachak jati hai

ret jaise hamein lagne lage sare rishte

ret hathon se uThao to sarak jati hai

jab bhi sunti hai wo anjam-e-wafa ke qisse

ek laDki meri godi mein dubak jati hai

mo'jiza bhi tere bose ka 'ajab hai ai man

chum leti hai to taqdir chamak jati hai

'ishq mein log bahak jaen to hairat kaisi

bin payambar ke to ummat bhi bahak jati hai

aise bhaTka hun teri yaad ke sahraon mein

jaise bachchi kisi mele mein bhaTak jati hai

KHarch itna bhi na ashkon ko kiya kar ai 'dil'

Dher ro dene se ye aankh chipak jati hai