dekh na paya jis paikar ko wadon ki angnai mein

dekh na paayā jis paikar ko vā'doñ kī añgnā.ī meñ

DhūñD rahā huuñ us kā chehra ḳhvāboñ meñ tanhā.ī meñ

kaise ho mā'lūm ye āḳhir purvā.ī ke jhoñkoñ ko

phūloñ par kyā biit chukī hai shāḳhoñ kī añgḌā.ī meñ

Dhalte sūraj kī āñkhoñ ne āḳhir mujh ko DhūñD liyā

chhup na sakā maiñ bhī pīpal ke saa.e kī lambā.ī meñ

pā kar terī saañs kī aahaT dil yuuñ machlā jaa.e hai

jaise shor machā.e gāgar panghaT kī gahrā.ī meñ

har ik shaḳhs ke aage karūñ kyuuñ shikve kī dīvār khaḌī

sirf ik terā haath hai mere lahje kī rusvā.ī meñ

'shāriq' Daal do āñkhoñ par tum apnī palkoñ kā ye ġhilāf

saarā shahr pahuñch gayā hai sannāTe kī khaa.ī meñ

dekh na paya jis paikar ko wa'don ki angnai mein

DhunD raha hun us ka chehra KHwabon mein tanhai mein

kaise ho ma'lum ye aaKHir purwai ke jhonkon ko

phulon par kya bit chuki hai shaKHon ki angDai mein

Dhalte suraj ki aankhon ne aaKHir mujh ko DhunD liya

chhup na saka main bhi pipal ke sae ki lambai mein

pa kar teri sans ki aahaT dil yun machla jae hai

jaise shor machae gagar panghaT ki gahrai mein

har ek shaKHs ke aage karun kyun shikwe ki diwar khaDi

sirf ek tera hath hai mere lahje ki ruswai mein

'shaariq' Dal do aankhon par tum apni palkon ka ye ghilaf

sara shahr pahunch gaya hai sannaTe ki khai mein