dekh pai na mere sae mein chalta saya

dekh paa.ī na mire saa.e meñ chaltā saaya

aa ga.ī raat uThāne mirā Dhaltā saaya

tum ne achchhā hī kiyā chhoḌ ga.e vaise bhī

ek saa.e se bhalā kaise sañbhaltā saaya

maiñ vahī huuñ mirā saaya bhī vahī hai ab tak

maiñ badaltā to koī rang badaltā saaya

maiñ ne is vāste muñh kar liyā sūraj kī taraf

mujh se dekhā na gayā aage nikaltā saaya

aaj bhī baiThā huuñ gum-sum pas-e-dīvār-e-anā

mujh se lipTā hai tirī yaad kā jaltā saaya

tujh pe guzrī hī nahīñ vahshat-e-shām-e-hijrāñ

tū ne dekhā hī nahīñ peḌ nigaltā saaya

dekh pai na mere sae mein chalta saya

aa gai raat uThane mera Dhalta saya

tum ne achchha hi kiya chhoD gae waise bhi

ek sae se bhala kaise sanbhalta saya

main wahi hun mera saya bhi wahi hai ab tak

main badalta to koi rang badalta saya

main ne is waste munh kar liya suraj ki taraf

mujh se dekha na gaya aage nikalta saya

aaj bhi baiTha hun gum-sum pas-e-diwar-e-ana

mujh se lipTa hai teri yaad ka jalta saya

tujh pe guzri hi nahin wahshat-e-sham-e-hijran

tu ne dekha hi nahin peD nigalta saya