dekh to furqat mein kya kya haal-e-dil par gham hua

dekh to furqat meñ kyā kyā hāl-e-dil par ġham huā

raat bhar siine meñ ai zālim baḌā mātam huā

dil ke marne se jahāñ kab darham-o-barham huā

sīna-kūbī maiñ ne kī itnā faqat mātam huā

tāqat-e-faryād aa.ī kuchh ajab aalam huā

lo qayāmat aa ga.ī dard-e-jigar phir kam huā

Tāñke TuuTe zaḳhm-e-dil ke baḌh gayā josh-e-junūñ

khul ga.iiñ kaliyāñ bahār aa.ī nayā aalam huā

sach to hai ham-sāye kī aafat se hotī hai gazand

tiir siine par lagā dil kā ajab aalam huā

saḳht-jānī se mirī tū bhī ḳhajil hogā zarūr

dekh ai qātil tirī talvār kā sar ḳham huā

baal kyoñ khole hasīnoñ ne baḌhīñ rusvā.iyāñ

mujh ko to ronā hai is kā kyoñ mirā mātam huā

dekh to furqat mein kya kya haal-e-dil par gham hua

raat bhar sine mein ai zalim baDa matam hua

dil ke marne se jahan kab darham-o-barham hua

sina-kubi main ne ki itna faqat matam hua

taqat-e-faryaad aai kuchh ajab aalam hua

lo qayamat aa gai dard-e-jigar phir kam hua

Tanke TuTe zaKHm-e-dil ke baDh gaya josh-e-junun

khul gain kaliyan bahaar aai naya aalam hua

sach to hai ham-saye ki aafat se hoti hai gazand

tir sine par laga dil ka ajab aalam hua

saKHt-jaani se meri tu bhi KHajil hoga zarur

dekh ai qatil teri talwar ka sar KHam hua

baal kyon khole hasinon ne baDhin ruswaiyan

mujh ko to rona hai is ka kyon mera matam hua