dekh tu kis qadar bhala dukh hai

dekh tū kis qadar bhalā dukh hai

shaam hote hī aa gayā dukh hai

dil kī dīvār par Tañgī āñkheñ

dil kī dahlīz par jamā dukh hai

thak ke baiThī huuñ ek kone meñ

aur kamre meñ ghūmtā dukh hai

mujh se pūchho nā ḳhairiyat kā sabab

mere har dard kī davā dukh hai

zindagī to haqīqī ma.anoñ meñ

ḳhaak se ḳhaak par likhā dukh hai

yā mire dushmanoñ kā dukh hai mujhe

yā mirī āstīn kā dukh hai

haath kānoñ pe rakh liye maiñ ne

kis qadar chup meñ chīḳhtā dukh hai

mere hañsne pe phir 'muqaddas' jī

aa ki mujh par baras paḌā dukh hai

dekh tu kis qadar bhala dukh hai

sham hote hi aa gaya dukh hai

dil ki diwar par Tangi aankhen

dil ki dahliz par jama dukh hai

thak ke baiThi hun ek kone mein

aur kamre mein ghumta dukh hai

mujh se puchho na KHairiyat ka sabab

mere har dard ki dawa dukh hai

zindagi to haqiqi manon mein

KHak se KHak par likha dukh hai

ya mere dushmanon ka dukh hai mujhe

ya meri aastin ka dukh hai

hath kanon pe rakh liye main ne

kis qadar chup mein chiKHta dukh hai

mere hansne pe phir 'muqaddas' ji

aa ki mujh par baras paDa dukh hai