dekha idhar kisi ne udhar maine aah ki

dekhā idhar kisī ne udhar maiñ ne aah kī

taḌpā rahī hai qalb ko bijlī nigāh kī

ban aa.e phir to hashr meñ har uzr-ḳhvāh kī

do apne haath se jo sazā tum gunāh kī

ab maiñ yūñhī lahad meñ bhī badlūñgā karvaTeñ

merā to dam nikaltā thā kyoñ tum ne aah kī

samjhe na bachpane se ki kis par paḌegā tiir

ā.īna dekhne meñ bhī tirchhī nigāh kī

ik aur bhī rafīq mirā chhūTne ko hai

hāthoñ se dil pakaḌ liyā jab maiñ ne aah kī

vo aur ruḳh pe zulf ko bikhrā.e aa.e haiñ

taqdīr dekhiye mire roz-e-siyāh kī

maiñ mar gayā thā ḳhanda-e-zaḳhm-e-jigar se bhī

zālim hañsī meñ jaan ga.ī be-gunāh kī

kuchh aap kā gila thā na shikva adū kā thā

sharmā ke kyoñ huzūr ne nīchī nigāh kī

āñkhoñ hī meñ rahegā ye 'safdar' kā ḳhuun hai

tum aa.ine meñ dekho to surḳhī nigāh kī

dekha idhar kisi ne udhar main ne aah ki

taDpa rahi hai qalb ko bijli nigah ki

ban aae phir to hashr mein har uzr-KHwah ki

do apne hath se jo saza tum gunah ki

ab main yunhi lahad mein bhi badlunga karwaTen

mera to dam nikalta tha kyon tum ne aah ki

samjhe na bachpane se ki kis par paDega tir

aaina dekhne mein bhi tirchhi nigah ki

ek aur bhi rafiq mera chhuTne ko hai

hathon se dil pakaD liya jab main ne aah ki

wo aur ruKH pe zulf ko bikhrae aae hain

taqdir dekhiye mere roz-e-siyah ki

main mar gaya tha KHanda-e-zaKHm-e-jigar se bhi

zalim hansi mein jaan gai be-gunah ki

kuchh aap ka gila tha na shikwa adu ka tha

sharma ke kyon huzur ne nichi nigah ki

aankhon hi mein rahega ye 'safdar' ka KHun hai

tum aaine mein dekho to surKHi nigah ki