dekha jo ek shaKHs ajab aan-ban ka

dekhā jo ek shaḳhs 'ajab ān-bān kā

ik silsila sā rahtā hai har-vaqt dhyān kā

be-soche-samjhe ghar se jo yūñhī nikal paḌe

ab DhūñDte haiñ saaya kisī sā.ebān kā

koī nahīñ hai aisā ki apnā kaheñ jise

kaisā tilism TuuTā hai apne gumān kā

bastī meñ haiñ pa aise ki sab se judā haiñ ham

achchhā thā ḳhabt ham ko bhī ūñche makān kā

mauj-e-nafas ke saath rahe rishta-e-umīd

dhaḌkā sā varna rahtā hai har-vaqt jaan kā

zālim ḳhudā se Dar kahīñ bijlī na gir paḌe

mushkil bahut hai girnā agar āsmān kā

jis ghar meñ hañste khelte guzrī hai ek 'umr

rishta bhī ab to yaad nahīñ us makān kā

nākāmiyoñ ko ham ne muqaddar banā liyā

ab Dar nahīñ rahā hai kisī imtihān kā

'nādir' vo kab balāoñ ko ḳhātir meñ laate haiñ

rakhte haiñ jo bhī hausla ūñchī uḌaan kā

dekha jo ek shaKHs 'ajab aan-ban ka

ek silsila sa rahta hai har-waqt dhyan ka

be-soche-samjhe ghar se jo yunhi nikal paDe

ab DhunDte hain saya kisi saeban ka

koi nahin hai aisa ki apna kahen jise

kaisa tilism TuTa hai apne guman ka

basti mein hain pa aise ki sab se juda hain hum

achchha tha KHabt hum ko bhi unche makan ka

mauj-e-nafas ke sath rahe rishta-e-umid

dhaDka sa warna rahta hai har-waqt jaan ka

zalim KHuda se Dar kahin bijli na gir paDe

mushkil bahut hai girna agar aasman ka

jis ghar mein hanste khelte guzri hai ek 'umr

rishta bhi ab to yaad nahin us makan ka

nakaamiyon ko hum ne muqaddar bana liya

ab Dar nahin raha hai kisi imtihan ka

'nadir' wo kab balaon ko KHatir mein late hain

rakhte hain jo bhi hausla unchi uDan ka