dekha kabhu na us dil-e-nashad ki taraf

dekhā kabhū na us dil-e-nāshād kī taraf

kartā rahā tū apnī hī bedād kī taraf

jis gul ne sun ke nāla-e-bulbul uḌā diyā

rakhtā hai gosh kab mirī fariyād kī taraf

muuñd ai par-e-shikasta na chāk-e-qafas ki ham

Tuk yaañ ko dekh lete haiñ sayyād kī taraf

kahte haiñ girya ḳhāna-e-dil kar chukā ḳharāb

aatā hai chashm ab tirī buniyād kī taraf

liijo ḳhabar mire bhī dil-e-zār kī nasīm

jaave agar tū us sitam-ābād kī taraf

'qā.em' tū is ġhazal ko yūñhī sarsarī hī kah

honā paḌegā hazrat-e-ustād kī taraf

dekha kabhu na us dil-e-nashad ki taraf

karta raha tu apni hi bedad ki taraf

jis gul ne sun ke nala-e-bulbul uDa diya

rakhta hai gosh kab meri fariyaad ki taraf

mund ai par-e-shikasta na chaak-e-qafas ki hum

Tuk yan ko dekh lete hain sayyaad ki taraf

kahte hain girya KHana-e-dil kar chuka KHarab

aata hai chashm ab teri buniyaad ki taraf

lijo KHabar mere bhi dil-e-zar ki nasim

jawe agar tu us sitam-abaad ki taraf

'qaem' tu is ghazal ko yunhi sarsari hi kah

hona paDega hazrat-e-ustad ki taraf