dekha karo na tum nigah-e-sehr-fan ke sath

dekhā karo na tum nigah-e-sehr-fan ke saath

achchhī nahīñ ye chheḌ dil-e-pur-mehan ke saath

thī dushmanī jo ḳhaak ko mujh ḳhasta-tan ke saath

dil kā ġhubār us ne nikālā kafan ke saath

baiThā huā huuñ bazm meñ ik sīm-tan ke saath

saaqī lagā de sāġhar-e-zarrīñ dahan ke saath

muddat ke baa'd aa.ī hai shām-e-shab-e-visāl

kyā din phire haiñ gardish-e-charḳh-e-kuhan ke saath

duniyā se nā-murād chalā hai shahīd-e-'ishq

lipTe hue haiñ hasrat-o-armāñ kafan ke saath

Thahregā kyā ye tiir havā.ī ke sāmne

āh-e-rasā ko laag hai charḳh-e-kuhan ke saath

kah do savāl-e-vasl pe tum phir nahīñ nahīñ

bal Daal kar jabīñ pe usī bāñkpan ke saath

ab tak hai bū-e-gul se mo'attar mirā dimāġh

soyā thā ek raat kisī gul-badan ke saath

rahtā hai mujh ko taaza balāoñ kā sāmnā

rahtā huuñ jab se zulf-e-shikan-dar-shikan ke saath

haiñ saath saath hasrat-o-armāñ ke qāfile

sū-e-adam chalā huuñ maiñ ik anjuman ke saath

kaT jā.egī ye umr-e-do-roza jahān meñ

lutf-o-ḳhushī ke saath ki ranj-o-mehan ke saath

vo ban ke ashk-e-ḳhūñ mirī āñkhoñ se bah gayā

phūTā jo koī aabla dil kī jalan ke saath

ye 'nāz' aarzū hai ki ho hind ko 'urūj

dekheñ ham is ko phir usī ahd-e-kuhan ke saath

dekha karo na tum nigah-e-sehr-fan ke sath

achchhi nahin ye chheD dil-e-pur-mehan ke sath

thi dushmani jo KHak ko mujh KHasta-tan ke sath

dil ka ghubar us ne nikala kafan ke sath

baiTha hua hun bazm mein ek sim-tan ke sath

saqi laga de saghar-e-zarrin dahan ke sath

muddat ke ba'd aai hai sham-e-shab-e-visal

kya din phire hain gardish-e-charKH-e-kuhan ke sath

duniya se na-murad chala hai shahid-e-'ishq

lipTe hue hain hasrat-o-arman kafan ke sath

Thahrega kya ye tir hawai ke samne

aah-e-rasa ko lag hai charKH-e-kuhan ke sath

kah do sawal-e-wasl pe tum phir nahin nahin

bal Dal kar jabin pe usi bankpan ke sath

ab tak hai bu-e-gul se mo'attar mera dimagh

soya tha ek raat kisi gul-badan ke sath

rahta hai mujh ko taza balaon ka samna

rahta hun jab se zulf-e-shikan-dar-shikan ke sath

hain sath sath hasrat-o-arman ke qafile

su-e-adam chala hun main ek anjuman ke sath

kaT jaegi ye umr-e-do-roza jahan mein

lutf-o-KHushi ke sath ki ranj-o-mehan ke sath

wo ban ke ashk-e-KHun meri aankhon se bah gaya

phuTa jo koi aabla dil ki jalan ke sath

ye 'naz' aarzu hai ki ho hind ko 'uruj

dekhen hum is ko phir usi ahd-e-kuhan ke sath