dekha kisi ka humne na aisa suna dimagh

dekhā kisī kā ham ne na aisā sunā dimāġh

in sang-dil butoñ kā hai allāh kyā dimāġh

kartā nahīñ tamīz sharīf-o-razīl meñ

is charḳh-e-pīr kā hai magar phir gayā dimāġh

dekhe bahut haiñ ham ne hasīnān-e-pur-ġhurūr

lekin 'ajab tarah kā hai kuchh aap kā dimāġh

kal jitnā ham ne us ko manā ke banāyā thā

utnā hī aaj aur hai bigḌā huā dimāġh

jab hoñge pesh dāvar-e-mahshar ke sāmne

ham dekh leñge aap kā roz-e-jazā dimāġh

aayā nahīñ samajh meñ ye ulTā mu'āmla

ban ban ke kyuuñ bigaḌtā hai ye aap kā dimāġh

gul kī bahār gulsitāñ meñ chand roz hai

achchhā nahīñ hai is qadar ai mah-laqā dimāġh

ai 'mashriqī' kabhī thā dimāġh apnā arsh par

hai āj-kal to ḳhaak meñ apnā milā dimāġh

dekha kisi ka hum ne na aisa suna dimagh

in sang-dil buton ka hai allah kya dimagh

karta nahin tamiz sharif-o-razil mein

is charKH-e-pir ka hai magar phir gaya dimagh

dekhe bahut hain hum ne hasinan-e-pur-ghurur

lekin 'ajab tarah ka hai kuchh aap ka dimagh

kal jitna hum ne us ko mana ke banaya tha

utna hi aaj aur hai bigDa hua dimagh

jab honge pesh dawar-e-mahshar ke samne

hum dekh lenge aap ka roz-e-jaza dimagh

aaya nahin samajh mein ye ulTa mu'amla

ban ban ke kyun bigaDta hai ye aap ka dimagh

gul ki bahaar gulsitan mein chand roz hai

achchha nahin hai is qadar ai mah-laqa dimagh

ai 'mashriqi' kabhi tha dimagh apna arsh par

hai aaj-kal to KHak mein apna mila dimagh