dekha tha kis nazar se tumne hansi hansi mein

dekhā thā kis nazar se tum ne hañsī hañsī meñ

ik dard-e-mustaqil hai ab merī zindagī meñ

ka.aba bhī but-kada bhī hai rāh-e-bandagī meñ

ye manzileñ haiñ kaisī dushvār āshiqī meñ

ai dost yaad un kī ab tak rulā rahī hai

do din jo mil ga.e the hañsne ko zindagī meñ

ik baat par hamārī uljhan meñ paḌ ga.e tum

duniyā na jaane kyā kyā kartī hai dostī meñ

jab hosh meñ rahā maiñ chhupte rahe vo mujh se

parde haTā diye sab dekhā jo be-ḳhudī meñ

ai merī shām-e-furqat yuuñ dil nahīñ bahaltā

kuchh aur raushnī kar tāroñ kī raushnī meñ

manzil pe mujh ko lā kar dāman jhaTak rahe ho

yaad aa.egā mujhe ye ehsān zindagī meñ

daur-e-ḳhizāñ se ab to bahlā rahā huuñ dil ko

kāñToñ meñ phañs gayā huuñ phūloñ kī dostī meñ

tū un ke sāmne ho vo tere sāmne hoñ

aisā bhī ek sajda 'ārif' ho be-ḳhudī meñ

dekha tha kis nazar se tum ne hansi hansi mein

ek dard-e-mustaqil hai ab meri zindagi mein

kaba bhi but-kada bhi hai rah-e-bandagi mein

ye manzilen hain kaisi dushwar aashiqi mein

ai dost yaad un ki ab tak rula rahi hai

do din jo mil gae the hansne ko zindagi mein

ek baat par hamari uljhan mein paD gae tum

duniya na jaane kya kya karti hai dosti mein

jab hosh mein raha main chhupte rahe wo mujh se

parde haTa diye sab dekha jo be-KHudi mein

ai meri sham-e-furqat yun dil nahin bahalta

kuchh aur raushni kar taron ki raushni mein

manzil pe mujh ko la kar daman jhaTak rahe ho

yaad aaega mujhe ye ehsan zindagi mein

daur-e-KHizan se ab to bahla raha hun dil ko

kanTon mein phans gaya hun phulon ki dosti mein

tu un ke samne ho wo tere samne hon

aisa bhi ek sajda 'arif' ho be-KHudi mein