dekhe hue kisi ko bahut din guzar gae

dekhe hue kisī ko bahut din guzar ga.e

is dil kī bebasī ko bahut din guzar ga.e

har shab chhatoñ pe chāñd utartā to hai magar

is ghar meñ chāñdnī ko bahut din guzar ga.e

koī javāz DhūñD ġham-e-nā-shanās kā

be-vaj.h bekalī ko bahut din guzar ga.e

ab tak akele-pan kā musalsal azaab hai

duniyā se dostī ko bahut din guzar ga.e

terī rifāqateñ to muqaddar meñ hī na thiiñ

ab apnī hī kamī ko bahut din guzar ga.e

muddat huī hai TuuT ke royā nahīñ huuñ maiñ

is chain kī ghaḌī ko bahut din guzar ga.e

vo jāgtī havelī bhī vīrān ho ga.ī

us nuqra.ī hañsī ko bahut din guzar ga.e

vo qahqahe bhī vaqt ke sahrā meñ kho ga.e

galiyoñ kī ḳhāmushī ko bahut din guzar ga.e

muddat huī ki raat kā vo jāgnā gayā

is ranj-e-āshiqī ko bahut din guzar ga.e

jo e.atibār-e-zaḳhm hunar ne atā kiyā

'dānish' vo shā.erī ko bahut din guzar ga.e

dekhe hue kisi ko bahut din guzar gae

is dil ki bebasi ko bahut din guzar gae

har shab chhaton pe chand utarta to hai magar

is ghar mein chandni ko bahut din guzar gae

koi jawaz DhunD gham-e-na-shanas ka

be-wajh bekali ko bahut din guzar gae

ab tak akele-pan ka musalsal azab hai

duniya se dosti ko bahut din guzar gae

teri rifaqaten to muqaddar mein hi na thin

ab apni hi kami ko bahut din guzar gae

muddat hui hai TuT ke roya nahin hun main

is chain ki ghaDi ko bahut din guzar gae

wo jagti haweli bhi viran ho gai

us nuqrai hansi ko bahut din guzar gae

wo qahqahe bhi waqt ke sahra mein kho gae

galiyon ki KHamushi ko bahut din guzar gae

muddat hui ki raat ka wo jagna gaya

is ranj-e-ashiqi ko bahut din guzar gae

jo eatibar-e-zaKHm hunar ne ata kiya

'danish' wo shaeri ko bahut din guzar gae