dekhen ab kya dil-jalon se bol bole jaenge

dekheñ ab kyā dil-jaloñ se bol bole jā.eñge

laag hī se phuuT kyā dil ke phaphole jā.eñge

hai yahāñ paimāna māl-o-naqd hī lekin vahāñ

zarf kī mīzān par hī log tole jā.eñge

mash.al-e-māzī dikhā saktī hai mustaqbil kī raah

hai ye kunjī jis se saare qufl khole jā.eñge

yaad rakhne ke liye lamhe guzishta vaqt ke

ab kitāb-e-māzī ke panne TaTole jā.eñge

tauba tauba kis qadar muñh se Tapaktī hai shakar

is zabāñ se mīThe mīThe zahr ghole jā.eñge

ruuh kī bosīdgī ko dafn karne ke liye

dekhiyegā badle kis kis tan ke chole jā.eñge

hai sarāhā ḳhuub ye paivand-kārī kā hunar

rishta-dar-rishta sabhī ab pech khole jā.eñge

peñg baḌhtī jaa.e amrā.ī meñ jyuuñ jyuuñ din chaḌhe

shaam hote tak utāre sab hiñDole jā.eñge

lījiye dīvān-e-'nāqid' aap hī ke naam hai

ham kahāñ in be-tuke ash.ār ko le jā.eñge

dekhen ab kya dil-jalon se bol bole jaenge

lag hi se phuT kya dil ke phaphole jaenge

hai yahan paimana mal-o-naqd hi lekin wahan

zarf ki mizan par hi log tole jaenge

mashal-e-mazi dikha sakti hai mustaqbil ki rah

hai ye kunji jis se sare qufl khole jaenge

yaad rakhne ke liye lamhe guzishta waqt ke

ab kitab-e-mazi ke panne TaTole jaenge

tauba tauba kis qadar munh se Tapakti hai shakar

is zaban se miThe miThe zahr ghole jaenge

ruh ki bosidgi ko dafn karne ke liye

dekhiyega badle kis kis tan ke chole jaenge

hai saraha KHub ye paiwand-kari ka hunar

rishta-dar-rishta sabhi ab pech khole jaenge

peng baDhti jae amrai mein jyun jyun din chaDhe

sham hote tak utare sab hinDole jaenge

lijiye diwan-e-'naqid' aap hi ke nam hai

hum kahan in be-tuke ashaar ko le jaenge