dekhi hai maine ye bhi nairangi-e-zamana

dekhī hai maiñ ne ye bhī nairañgī-e-zamāna

insāf kī ridā meñ andāz-e-zālimāna

kitne hasīn din the anjān the jahāñ se

aatā hai yaad ab vo guzrā huā zamāna

tere hī dam se yārab ābād hai ye duniyā

hai bas yahī haqīqat baaqī jo hai fasāna

koī nahīñ dikhātā ab to hunar-shanāsī

uThtī hai jo nazar bhī hotī hai nāqidāna

kitnā hasīn terā andāz-e-guftugū hai

jī chāhtā hai likh duuñ tujh par koī fasāna

tum kyā ga.e ki duniyā maġhmūm lag rahī hai

ab zindagī ye mujh ko lagtī hai qaid-ḳhāna

dekhi hai main ne ye bhi nairangi-e-zamana

insaf ki rida mein andaz-e-zalimana

kitne hasin din the anjaan the jahan se

aata hai yaad ab wo guzra hua zamana

tere hi dam se yarab aabaad hai ye duniya

hai bas yahi haqiqat baqi jo hai fasana

koi nahin dikhata ab to hunar-shanasi

uThti hai jo nazar bhi hoti hai naqidana

kitna hasin tera andaz-e-guftugu hai

ji chahta hai likh dun tujh par koi fasana

tum kya gae ki duniya maghmum lag rahi hai

ab zindagi ye mujh ko lagti hai qaid-KHana