dekhiye ho gai badnam masihai bhi

dekhiye ho ga.ī badnām masīhā.ī bhī

ham na kahte the ki Taltī hai kahīñ aa.ī bhī

husn ḳhuddār ho to bā.is-e-shohrat hai zarūr

lekin in bātoñ meñ ho jaatī hai rusvā.ī bhī

saiñkaḌoñ ranj o alam dard o musībat shab-e-ġham

kitnī hañgāma-talab hai mirī tanhā.ī bhī

tum bhī dīvāne ke kahne kā burā maan ga.e

hosh kī baat kahīñ karte haiñ saudā.ī bhī

baal o par dekh to lo apne asīrān-e-qafas

kyā karoge jo gulistāñ meñ bahār aa.ī bhī

paañv vahshat meñ kahīñ rukte haiñ dīvānoñ ke

toḌ Dāleñge ye zanjīr jo pahnā.ī bhī

ai mire dekhne vaale tirī sūrat pe nisār

kaash hotī terī tasvīr meñ goyā.ī bhī

ai 'qamar' vo na huī dekhiye taqdīr kī baat

chāndnī raat jo qismat se kabhī aa.ī bhī

dekhiye ho gai badnam masihai bhi

hum na kahte the ki Talti hai kahin aai bhi

husn KHuddar ho to bais-e-shohrat hai zarur

lekin in baaton mein ho jati hai ruswai bhi

sainkaDon ranj o alam dard o musibat shab-e-gham

kitni hangama-talab hai meri tanhai bhi

tum bhi diwane ke kahne ka bura man gae

hosh ki baat kahin karte hain saudai bhi

baal o par dekh to lo apne asiran-e-qafas

kya karoge jo gulistan mein bahaar aai bhi

panw wahshat mein kahin rukte hain diwanon ke

toD Dalenge ye zanjir jo pahnai bhi

ai mere dekhne wale teri surat pe nisar

kash hoti teri taswir mein goyai bhi

ai 'qamar' wo na hui dekhiye taqdir ki baat

chandni raat jo qismat se kabhi aai bhi