dekhiye taqdir le jae kidhar

dekhiye taqdīr le jaa.e kidhar

ham-safar koī na koī rāhbar

bāvajūd-e-da.ava-e-fikr-o-nazar

ham rumūz-e-zīst se haiñ be-ḳhabar

zindagī ko ik sahārā chāhiye

mo'atabar ho vo ki ho nā-mo'tabar

nā-tavān-o-sust-rau bhī haiñ yahāñ

gardish-e-daurāñ zarā āhista-tar

zindagī ke ham pe haiñ ehsāñ bahut

ham se pūchho zindagī kā dard-e-sar

kab tujhe zebā hai ai shāhīñ-nazhād

ye qafas kā ġham ye rañj -bāl-o-par

bujh gayā dil to mayassar ab kahāñ

vo hasīñ din raat vo shām-o-sahar

tū ne un kā zikr phir chheḌā nadīm

jhuum uTThe dekh vo dīvār-o-dar

aap ko shab-zinda-dārī kī qasam

hazrat-e-'tālib' kahāñ the raat bhar

dekhiye taqdir le jae kidhar

ham-safar koi na koi rahbar

bawajud-e-dawa-e-fikr-o-nazar

hum rumuz-e-zist se hain be-KHabar

zindagi ko ek sahaara chahiye

mo'atabar ho wo ki ho na-mo'tabar

na-tawan-o-sust-rau bhi hain yahan

gardish-e-dauran zara aahista-tar

zindagi ke hum pe hain ehsan bahut

hum se puchho zindagi ka dard-e-sar

kab tujhe zeba hai ai shahin-nazhad

ye qafas ka gham ye ranj -baal-o-par

bujh gaya dil to mayassar ab kahan

wo hasin din raat wo sham-o-sahar

tu ne un ka zikr phir chheDa nadim

jhum uTThe dekh wo diwar-o-dar

aap ko shab-zinda-dari ki qasam

hazrat-e-'talib' kahan the raat bhar