dekhna ye ishq mein husn-e-pazirai ke rang

dekhnā ye 'ishq meñ husn-e-pazīrā.ī ke rang

anjuman-dar-anjuman hoñ merī tanhā.ī ke rang

dil ke har goshe meñ jal uTThe haiñ zaḳhmoñ ke charāġh

allāh allāh ik masīhā kī masīhā.ī ke rang

is adā se aa ga.e haiñ vo nazar ke rū-ba-rū

aur gahre ho ga.e is dil kī bīnā.ī ke rang

ho sadāqat kā jo dā'vā dekh le jī aa.ina

aa.ine hī meñ nazar aate haiñ sachchā.ī ke rang

har dar-o-dīvār par likkhā huā hai merā naam

vaj.h-e-shohrat ban ga.e haiñ kitne rusvā.ī ke rang

har nazar apnī jagah ḳhud ek jalva ban ga.ī

chhā ga.e aise tumhārī jalva-ārā.ī ke rang

der tak 'aḳhgar' dar-e-jāñ par charāġhoñ kī tarah

raushnī dete rahe merī jabīñ-sā.ī ke rang

dekhna ye 'ishq mein husn-e-pazirai ke rang

anjuman-dar-anjuman hon meri tanhai ke rang

dil ke har goshe mein jal uTThe hain zaKHmon ke charagh

allah allah ek masiha ki masihai ke rang

is ada se aa gae hain wo nazar ke ru-ba-ru

aur gahre ho gae is dil ki binai ke rang

ho sadaqat ka jo da'wa dekh le ji aaina

aaine hi mein nazar aate hain sachchai ke rang

har dar-o-diwar par likkha hua hai mera nam

wajh-e-shohrat ban gae hain kitne ruswai ke rang

har nazar apni jagah KHud ek jalwa ban gai

chha gae aise tumhaari jalwa-arai ke rang

der tak 'aKHgar' dar-e-jaan par charaghon ki tarah

raushni dete rahe meri jabin-sai ke rang