dekho ki dil-jalon ki kya KHub zindagi hai

dekho ki dil-jaloñ kī kyā ḳhuub zindagī hai

parvāne jal chuke haiñ aur sham.a jal rahī hai

kahne ko muḳhtasar sā ik lafz hai mohabbat

lekin usī meñ saarī duniyā chhipī huī hai

ḳhvāb-e-hasīñ se mujh ko chauñkā diyā hai kis ne

kis ne chaman meñ aa kar āvāz mujh ko dī hai

dekho zarā faroġh-e-husn-e-bahār dekho

ik ik kalī chaman kī dulhan banī huī hai

laa.e bashar kahāñ se us husn kī misāleñ

qudrat jise banā kar hairat meñ kho ga.ī hai

bujhtī nahīñ hai saare aalam ke āñsuoñ se

ye kaisī aag mere dil meñ bhaḌak rahī hai

ai 'prem' zarb-e-sar se zindāñ ko toḌ Daalo

pābandiyoñ kā jiinā bhī koī zindagī hai

dekho ki dil-jalon ki kya KHub zindagi hai

parwane jal chuke hain aur shama jal rahi hai

kahne ko muKHtasar sa ek lafz hai mohabbat

lekin usi mein sari duniya chhipi hui hai

KHwab-e-hasin se mujh ko chaunka diya hai kis ne

kis ne chaman mein aa kar aawaz mujh ko di hai

dekho zara farogh-e-husn-e-bahaar dekho

ek ek kali chaman ki dulhan bani hui hai

lae bashar kahan se us husn ki misalen

qudrat jise bana kar hairat mein kho gai hai

bujhti nahin hai sare aalam ke aansuon se

ye kaisi aag mere dil mein bhaDak rahi hai

ai 'prem' zarb-e-sar se zindan ko toD Dalo

pabandiyon ka jina bhi koi zindagi hai