dekho to mere nala-o-ah-o-fughan ki or

dekho to mere nāla-o-āh-o-fuġhāñ kī or

baan is kaḌak se jaave hai kab āsmāñ kī or

masjid ko chhoḌ aa.e kalīsā.īyāñ kī or

chhoḌā navāh-e-ka.aba chale ham butāñ kī or

zāhid tire kamāl pe māreñ haiñ pusht-e-pā

laa.e faro sar apnā jo pīr-e-muġhāñ kī or

sukh niiñd be-ḳhudī kī use turt aa ga.ī

laagā jo gosh Tuk bhī mirī dāstāñ kī or

TukḌe jigar ke bah chale ham-rāh-e-sail-e-ashk

laatā hai khīñch ḳhār-o-ḳhas āb-e-ravāñ kī or

zālim silāh bāñdh ke aanā ba-qasd-e-qatl

kyā hai zarūr apne kisī nīm-jāñ kī or

kuchh kam nahīñ tirī nigah-o-abrū-o-mizha

mat haath lā tū ḳhanjar-o-teġh-o-sināñ kī or

terī nigāh-e-mehr ne mujh se vo kuchh kiyā

jo kuchh ki chashm-e-māh kare hai katāñ kī or

un añkhḌiyoñ kī putliyoñ se aañkh jā lagī

jā phirtī na.iiñ nigāh ab un abruvāñ kī or

misra' ye apnā aayā 'jahāñdār' ham ko yaad

chhoḌā navāh-e-ka.aba chale ham butāñ kī or

dekho to mere nala-o-ah-o-fughan ki or

ban is kaDak se jawe hai kab aasman ki or

masjid ko chhoD aae kalisaiyan ki or

chhoDa nawah-e-kaba chale hum butan ki or

zahid tere kamal pe maren hain pusht-e-pa

lae faro sar apna jo pir-e-mughan ki or

sukh nind be-KHudi ki use turt aa gai

laga jo gosh Tuk bhi meri dastan ki or

TukDe jigar ke bah chale ham-rah-e-sail-e-ashk

lata hai khinch KHar-o-KHas aab-e-rawan ki or

zalim silah bandh ke aana ba-qasd-e-qatl

kya hai zarur apne kisi nim-jaan ki or

kuchh kam nahin teri nigah-o-abru-o-mizha

mat hath la tu KHanjar-o-tegh-o-sinan ki or

teri nigah-e-mehr ne mujh se wo kuchh kiya

jo kuchh ki chashm-e-mah kare hai katan ki or

un ankhDiyon ki putliyon se aankh ja lagi

ja phirti nain nigah ab un abruwan ki or

misra' ye apna aaya 'jahandar' hum ko yaad

chhoDa nawah-e-kaba chale hum butan ki or