dekho to zara ghazab KHuda ka

dekho to zarā ġhazab ḳhudā kā

zālim ne mujhī ko pahle taakā

allāh atā kare qanā'at

nusḳha-e-vājib-ul-adā kā

dil detā huuñ muft aur koī

pursāñ nahīñ naqd-e-nāravā kā

vaañ mujh pe jafā.eñ ho rahī haiñ

yaañ vird hai lafz-e-marhabā kā

aanā ho to naz' meñ huuñ aao

ye vaqt nahīñ hai iltavā kā

ab aa.e ho ban ke tum masīhā

jab vaqt guzar chukā davā kā

dāman meñ ravāñ haiñ ashk-e-gulgūñ

mahzar hai ye ḳhūn-e-mudda.ā kā

laayā to hai un ko jazb-e-ulfat

aayā to hai dhyān be-navā kā

maiñ ho hī chukā thā zinda dargor

tum aa ga.e shukr hai ḳhudā kā

duniyā se guzar chuke to 'parvīñ'

jhagḌā na rahā fanā baqā kā

dekho to zara ghazab KHuda ka

zalim ne mujhi ko pahle taka

allah ata kare qana'at

nusKHa-e-wajib-ul-ada ka

dil deta hun muft aur koi

pursan nahin naqd-e-narawa ka

wan mujh pe jafaen ho rahi hain

yan wird hai lafz-e-marhaba ka

aana ho to naz' mein hun aao

ye waqt nahin hai iltawa ka

ab aae ho ban ke tum masiha

jab waqt guzar chuka dawa ka

daman mein rawan hain ashk-e-gulgun

mahzar hai ye KHun-e-muddaa ka

laya to hai un ko jazb-e-ulfat

aaya to hai dhyan be-nawa ka

main ho hi chuka tha zinda dargor

tum aa gae shukr hai KHuda ka

duniya se guzar chuke to 'parwin'

jhagDa na raha fana baqa ka