dekhta hun phul aur kanTe ba-har-su aaj bhi

dekhtā huuñ phuul aur kāñTe ba-har-sū aaj bhī

yaad kartā huuñ tirī ḳhushbū tirī ḳhū aaj bhī

jaane kyuuñ jaltī sulagtī shaam ke aivān meñ

phail jaatī hai tirī bātoñ kī ḳhushbū aaj bhī

ziist ke ḳhasta shikasta gumbadoñ meñ gāh-gāh

gūñjtā hai terī āvāzoñ kā jaadū aaj bhī

zulf kab kī ātish-e-ayyām se kumhlā ga.ī

zulf kā saaya nahīñ Dhaltā sar-e-mū aaj bhī

tū ne paane haath meñ jis par likhā thā merā naam

vo sanobar lahlahātā hai lab-e-jū aaj bhī

vo tirā pal-bhar ko milnā phir bichhaḌne ke liye

dil kī muTThī meñ hai is lamhe kā jugnū aaj bhī

muddateñ guzrīñ magar ai dost tere naam par

Dol jaatī hai mire dil kī tarāzū aaj bhī

dekhta hun phul aur kanTe ba-har-su aaj bhi

yaad karta hun teri KHushbu teri KHu aaj bhi

jaane kyun jalti sulagti sham ke aiwan mein

phail jati hai teri baaton ki KHushbu aaj bhi

zist ke KHasta shikasta gumbadon mein gah-gah

gunjta hai teri aawazon ka jadu aaj bhi

zulf kab ki aatish-e-ayyam se kumhla gai

zulf ka saya nahin Dhalta sar-e-mu aaj bhi

tu ne pane hath mein jis par likha tha mera nam

wo sanobar lahlahata hai lab-e-ju aaj bhi

wo tera pal-bhar ko milna phir bichhaDne ke liye

dil ki muTThi mein hai is lamhe ka jugnu aaj bhi

muddaten guzrin magar ai dost tere nam par

Dol jati hai mere dil ki taraazu aaj bhi