دیکھتا ہوں تجھ کو اکثر اے سمندر اے سمندر

دیکھتا ہوں تجھ کو اکثر اے سمندر اے سمندر

جیسے ہو تو میرے اندر اے سمندر اے سمندر

تیرے طوفانوں نے کی یلغار چٹانوں پہ شب بھر

شور تھا بام فلک پر اے سمندر اے سمندر

ڈھونڈھتی ہے آنکھ سطح آب پر چہرہ کسی کا

تو بنا دے اس کا پیکر اے سمندر اے سمندر

بیکرانی میں تو اپنی میری ویرانی سمو لے

میں ہوا ہوں پھر سے بے گھر اے سمندر اے سمندر

تیرگی کی پھیلتی چادر ہے ہم دونوں ہی چپ کیوں

گونج اٹھ منظر بہ منظر اے سمندر اے سمندر

دیکھنے آیا ہے تجھ میں دور سے چل کر اویسیؔ

ڈوبتے سورج کا منظر اے سمندر اے سمندر