dekhte hi dekhte KHushbu ke paikar mar gae

dekhte hī dekhte ḳhushbū ke paikar mar ga.e

jis jagah sahrā ubhar aa.e samundar mar ga.e

TuuT kar milnā nahīñ mumkin huā us shaḳhs se

dil meñ ye rakkhe tamanna apne andar mar ga.e

naam par maz.hab ke khelā hai siyāsat ne ye khel

fitna-parvar bach ga.e aur amn-parvar mar ga.e

manzil-e-maqsūd tak jo kar rahe the rahbarī

rāstoñ kā zahr pī pī kar vo rahbar mar ga.e

jo tamāshā.ī the vo sairāb maujoñ se hue

tishnagī kā dard le kar sab shanāvar mar ga.e

aisī hālat meñ bhalā kyūñkar na hote ham zalīl

jin se ḳhuddārī thī ham meñ aise jauhar mar ga.e

ek lamhe ke liye bhī vo nahīñ aayā qarīñ

aur ham jazbāt kī shiddat se ghuT kar mar ga.e

ab nazar ke sāmne hai ek vīrāñ rahguzar

jo the āñkhoñ meñ mire 'naqvī' vo manzar mar ga.e

dekhte hi dekhte KHushbu ke paikar mar gae

jis jagah sahra ubhar aae samundar mar gae

TuT kar milna nahin mumkin hua us shaKHs se

dil mein ye rakkhe tamanna apne andar mar gae

nam par mazhab ke khela hai siyasat ne ye khel

fitna-parwar bach gae aur amn-parwar mar gae

manzil-e-maqsud tak jo kar rahe the rahbari

raston ka zahr pi pi kar wo rahbar mar gae

jo tamashai the wo sairab maujon se hue

tishnagi ka dard le kar sab shanawar mar gae

aisi haalat mein bhala kyunkar na hote hum zalil

jin se KHuddari thi hum mein aise jauhar mar gae

ek lamhe ke liye bhi wo nahin aaya qarin

aur hum jazbaat ki shiddat se ghuT kar mar gae

ab nazar ke samne hai ek viran rahguzar

jo the aankhon mein mere 'naqwi' wo manzar mar gae