dekhte jate hain namnak hue jate hain

dekhte jaate haiñ namnāk hue jaate haiñ

kyā gulistāñ ḳhas-o-ḳhāshāk hue jaate haiñ

ek ik kar ke vo ġham-ḳhvār sitāre mere

ġham sar-e-vus.at-e-aflāk hue jaate haiñ

ḳhush nahīñ aayā ḳhizāñ ko mirā uryāñ honā

zard patte mirī poshāk hue jaate haiñ

dekh kar qarya-e-vīrāñ meñ zamistāñ kā chāñd

shaam ke saa.e alam-nāk hue jaate haiñ

zulm sab ahl-e-zamīñ par haiñ zamīñ vāloñ ke

ham abas dushman-e-aflāk hue jaate haiñ

dīda-e-tar se mayassar thā hameñ dil kā gudāz

qaht-e-giryā hai to saffāk hue jaate haiñ

kūza-gar ne hameñ miTTī se kiyā thā taḳhlīq

kyā ta.ajjub hai agar ḳhaak hue jaate haiñ

kaisī ibrat hai ki is kashmakash-e-rizq meñ ham

apne hī rizq kī ḳhūrāk hue jaate haiñ

dekhte jate hain namnak hue jate hain

kya gulistan KHas-o-KHashak hue jate hain

ek ek kar ke wo gham-KHwar sitare mere

gham sar-e-wusat-e-aflak hue jate hain

KHush nahin aaya KHizan ko mera uryan hona

zard patte meri poshak hue jate hain

dekh kar qarya-e-viran mein zamistan ka chand

sham ke sae alam-nak hue jate hain

zulm sab ahl-e-zamin par hain zamin walon ke

hum abas dushman-e-aflak hue jate hain

dida-e-tar se mayassar tha hamein dil ka gudaz

qaht-e-girya hai to saffak hue jate hain

kuza-gar ne hamein miTTi se kiya tha taKHliq

kya tajjub hai agar KHak hue jate hain

kaisi ibrat hai ki is kashmakash-e-rizq mein hum

apne hi rizq ki KHurak hue jate hain