dekhti hai nigah pani mein

dekhtī hai nigāh paanī meñ

taḳht-e-ālam-panāh paanī meñ

ham se sailāb kā maza pūchho

ham hue haiñ tabāh paanī meñ

kyā samajhte haiñ aap gangā-jal

dhul ga.e kyā gunāh paanī meñ

maiñ sunātā huuñ pattharoñ ko ġhazal

aur hotī hai vaah paanī meñ

kashti-e-dil ko ab panāh kahāñ

lahr hai be-panāh paanī meñ

vo mirī mamlikat meñ aa hī ga.e

maiñ huā bādshāh paanī meñ

mauj hai yā adā hasīnoñ kī

gaah sāhil pe gaah paanī meñ

aa hī jā.egā raah par dariyā

tum nikālo to raah paanī meñ

tū bhī tishna hai aur maiñ bhī huuñ

ḳhuub hogī nibāh paanī meñ

terī ārām-gāh sāhil par

merī ārām-gāh paanī meñ

tū batā kyoñ 'fahīm' Duub gayā

tū rahā hai gavāh paanī meñ

dekhti hai nigah pani mein

taKHt-e-alam-panah pani mein

hum se sailab ka maza puchho

hum hue hain tabah pani mein

kya samajhte hain aap ganga-jal

dhul gae kya gunah pani mein

main sunata hun pattharon ko ghazal

aur hoti hai wah pani mein

kashti-e-dil ko ab panah kahan

lahr hai be-panah pani mein

wo meri mamlikat mein aa hi gae

main hua baadshah pani mein

mauj hai ya ada hasinon ki

gah sahil pe gah pani mein

aa hi jaega rah par dariya

tum nikalo to rah pani mein

tu bhi tishna hai aur main bhi hun

KHub hogi nibah pani mein

teri aaram-gah sahil par

meri aaram-gah pani mein

tu bata kyon 'fahim' Dub gaya

tu raha hai gawah pani mein