dekhun to kahan tak wo talattuf nahin karta

dekhūñ to kahāñ tak vo talattuf nahīñ kartā

aare se agar chīre to maiñ uf nahīñ kartā

tum dete ho taklīf mujhe hotī hai rāhat

sach jāniye maiñ is meñ takalluf nahīñ kartā

sab bāteñ unhīñ kī haiñ ye sach boliyo qāsid

kuchh apnī taraf se to tasarruf nahīñ kartā

sau ḳhauf kī ho jaa.e magar rind-e-nazar-bāz

dil jalva-gah-e-lānshaf-o-shuf nahīñ kartā

shoḳhī se kisī tarah se chain us ko nahīñ hai

aatā hai magar aa ke tavaqquf nahīñ kartā

us shoḳh-e-sitamgar se paḌā hai mujhe paalā

jo qatl kiye par bhī ta.assuf nahīñ kartā

jo kuchh hai anā meñ vo Tapaktā hai anā se

kuchh aap se maiñ zikr-e-tasavvuf nahīñ kartā

taskīn ho kyā vā'de se mā'shūq hai āḳhir

har chand sunā hai ki taḳhalluf nahīñ kartā

kyā haal tumhārā hai hameñ bhī to batāo

be-vajah koī 'shefta' uf uf nahīñ kartā

dekhun to kahan tak wo talattuf nahin karta

aare se agar chire to main uf nahin karta

tum dete ho taklif mujhe hoti hai rahat

sach jaaniye main is mein takalluf nahin karta

sab baaten unhin ki hain ye sach boliyo qasid

kuchh apni taraf se to tasarruf nahin karta

sau KHauf ki ho jae magar rind-e-nazar-baz

dil jalwa-gah-e-lanshaf-o-shuf nahin karta

shoKHi se kisi tarah se chain us ko nahin hai

aata hai magar aa ke tawaqquf nahin karta

us shoKH-e-sitamgar se paDa hai mujhe pala

jo qatl kiye par bhi tassuf nahin karta

jo kuchh hai ana mein wo Tapakta hai ana se

kuchh aap se main zikr-e-tasawwuf nahin karta

taskin ho kya wa'de se ma'shuq hai aaKHir

har chand suna hai ki taKHalluf nahin karta

kya haal tumhaara hai hamein bhi to batao

be-wajah koi 'shefta' uf uf nahin karta