der se apni aag mein KHud hi jalta hun

der se apnī aag meñ ḳhud hī jaltā huuñ

huuñ to bharī duniyā meñ lekin tanhā huuñ

ġham kī aag meñ tap kar kitnā nikhrā huuñ

ab mahsūs huā hai maiñ bhī sonā huuñ

bād-e-havādis aisā uḌaa.e phirtī hai

jaise maiñ ik peḌ kā TuuTā pattā huuñ

muddat se jis par koī dastak na huī

yaaro maiñ ghar kā aisā darvāza huuñ

apnī barbādī kā qissa kaise kahūñ

hoñToñ par jo aa na sakā vo naġhma huuñ

maiñ auroñ ke ġham kā mudāvā kyā sochūñ

maiñ to ḳhud apne hī ġham meñ uljhā huuñ

yaaro jaao aur koī dhandā socho

merī vus.at mat naapo maiñ sahrā huuñ

ab to 'mehdī' mujh ko chain se sone do

socho maiñ kitnī rātoñ kā jaagā huuñ

der se apni aag mein KHud hi jalta hun

hun to bhari duniya mein lekin tanha hun

gham ki aag mein tap kar kitna nikhra hun

ab mahsus hua hai main bhi sona hun

baad-e-hawadis aisa uDae phirti hai

jaise main ek peD ka TuTa patta hun

muddat se jis par koi dastak na hui

yaro main ghar ka aisa darwaza hun

apni barbaadi ka qissa kaise kahun

honTon par jo aa na saka wo naghma hun

main auron ke gham ka mudawa kya sochun

main to KHud apne hi gham mein uljha hun

yaro jao aur koi dhanda socho

meri wusat mat napo main sahra hun

ab to 'mehdi' mujh ko chain se sone do

socho main kitni raaton ka jaga hun