دیر تک نکہت گل نے جو سلایا ہے مجھے

دیر تک نکہت گل نے جو سلایا ہے مجھے

آ کے صحرا کی ہواؤں نے جگایا ہے مجھے

ایسی کچھ دور ہی منزل تو نہ تھی ہم سفرو

میری آہستہ خرامی نے تھکایا ہے مجھے

گم ہوں لیکن مرا پیراہن عشرت دیکھو

ان کے ہونٹوں نے تبسم میں چھپایا ہے مجھے

ایسا لگتا ہے کہ میخانے سے گھر تک یارو

دے کے بانہوں کا سہارا کوئی لایا ہے مجھے

ایسی تابش ہے کہ تاریک ہوئی ہے دنیا

شدت ہوش نے دیوانہ بنایا ہے مجھے

رنج محرومئ آغوش بہاراں نہ رہا

اتنے صحراؤں نے سینے سے لگایا ہے مجھے

چھوڑ کر صحن‌ چمن جب بھی چلا ہوں میں شمیمؔ

ایک اک پھول کی خوشبو نے منایا ہے مجھے