deta tha jo saya wo shajar kaT raha hai

detā thā jo saayā vo shajar kaaT rahā hai

ḳhud apne tahaffuz kī vo jaḌ kaaT rahā hai

be-samt uḌānoñ se pashīmāñ parinda

ab apnī hī minqār se par kaaT rahā hai

mahbūs huuñ ġhāroñ meñ magar āzar-e-taḳhīl

chaTTānoñ meñ ashkāl-e-hunar kaaT rahā hai

ik zarb-e-musalsal hai ki ruktī hī nahīñ hai

har tār-e-nafas dard-e-jigar kaaT rahā hai

hai kaun kamīñ-gāh meñ ye kaise batā.ūñ

har tiir magar mere hī par kaaT rahā hai

ummīd ujāle kā liye tesha har ik dil

har raat ba-andāz-e-sahar kaaT rahā hai

kartā hai fuzūñ vahshat-e-dil dasht kā mausam

'bilqīs' magar kyā karūñ ghar kaaT rahā hai

deta tha jo saya wo shajar kaT raha hai

KHud apne tahaffuz ki wo jaD kaT raha hai

be-samt uDanon se pashiman parinda

ab apni hi minqar se par kaT raha hai

mahbus hun ghaaron mein magar aazar-e-taKHil

chaTTanon mein ashkal-e-hunar kaT raha hai

ek zarb-e-musalsal hai ki rukti hi nahin hai

har tar-e-nafas dard-e-jigar kaT raha hai

hai kaun kamin-gah mein ye kaise bataun

har tir magar mere hi par kaT raha hai

ummid ujale ka liye tesha har ek dil

har raat ba-andaz-e-sahar kaT raha hai

karta hai fuzun wahshat-e-dil dasht ka mausam

'bilqis' magar kya karun ghar kaT raha hai