dete hain jis ko KHun-e-jigar kam bahut hi kam

dete haiñ jis ko ḳhūn-e-jigar kam bahut hī kam

aate haiñ us shajar pe samar kam bahut hī kam

baaqī haiñ ab bhī dil pe mire zaḳhm-e-hādsāt

ehsās-e-dard to hai magar kam bahut hī kam

ye munhasir hai kasb-e-halāl-o-harām par

hotā hai ab duā meñ asar kam bahut hī kam

vaa.iz kī guftugū meñ jo dām-e-fareb hai

paate haiñ us se log mafar kam bahut hī kam

ġhavvās-e-bahr-e-ilm haiñ girdāb-e-hirs meñ

bāzār meñ haiñ la.al-o-gohar kam bahut hī kam

ehsās jin ke dil meñ ho karb-e-yatīm kā

is ahd meñ haiñ aise bashar kam bahut hī kam

'sāhil' jo mil gayā hai to kuchh qadr kījiye

is tarah ke haiñ ahl-e-hunar kam bahut hī kam

dete hain jis ko KHun-e-jigar kam bahut hi kam

aate hain us shajar pe samar kam bahut hi kam

baqi hain ab bhi dil pe mere zaKHm-e-hadsat

ehsas-e-dard to hai magar kam bahut hi kam

ye munhasir hai kasb-e-halal-o-haram par

hota hai ab dua mein asar kam bahut hi kam

waiz ki guftugu mein jo dam-e-fareb hai

pate hain us se log mafar kam bahut hi kam

ghawwas-e-bahr-e-ilm hain girdab-e-hirs mein

bazar mein hain lal-o-gohar kam bahut hi kam

ehsas jin ke dil mein ho karb-e-yatim ka

is ahd mein hain aise bashar kam bahut hi kam

'sahil' jo mil gaya hai to kuchh qadr kijiye

is tarah ke hain ahl-e-hunar kam bahut hi kam