dhaDakte dil ko yun dhaDkan sunaya karte hain

dhaḌakte dil ko yuuñ dhaḌkan sunāyā karte haiñ

khulī hoñ bāñheñ to un meñ samāyā karte haiñ

ye chāhatoñ kā chalan siikh lo to achchhā hai

koī manā.e to bas maan jaayā karte haiñ

bahut sī bāteñ nahīñ hotī haiñ batāne kī

ba-taur-e-ḳhās mohabbat chhupāyā karte haiñ

ḳhudā ke vāste tafsīl meñ na jaayā karo

ki jitnā pūchhā ho utnā batāyā karte haiñ

jinheñ ho kahnā ki ruk jaa.eñ sab ko jaane deñ

milā ke haath zarā sā dabāyā karte haiñ

nahīf dil ko sañbhalne kā dījiye mauqa

Thahar Thahar ke ye jalve dikhāyā karte haiñ

agar ye dil ho ki sūraj kī dhuup saaya bane

to apne naam ke paude lagāyā karte haiñ

jinheñ likhā ho kisī ne baḌī mohabbat se

baḌe adab se vo naame jalāyā karte haiñ

vo jin ke dam se guloñ par nikhār aatā ho

bahār aa.e to un ko bulāyā karte haiñ

samajh lo baat chhupā.eñge jhuuT boleñge

jo baat karte hue sar khujāyā karte haiñ

na dekh paanā alag sā baḌhāvā detā hai

charāġh vasl se pahle bujhāyā karte haiñ

mire aziiz ai 'dānish-azīz’ baat samajh

jinheñ ho zo.am unheñ āzmāyā karte haiñ

dhaDakte dil ko yun dhaDkan sunaya karte hain

khuli hon banhen to un mein samaya karte hain

ye chahaton ka chalan sikh lo to achchha hai

koi manae to bas man jaya karte hain

bahut si baaten nahin hoti hain batane ki

ba-taur-e-KHas mohabbat chhupaya karte hain

KHuda ke waste tafsil mein na jaya karo

ki jitna puchha ho utna bataya karte hain

jinhen ho kahna ki ruk jaen sab ko jaane den

mila ke hath zara sa dabaya karte hain

nahif dil ko sanbhalne ka dijiye mauqa

Thahar Thahar ke ye jalwe dikhaya karte hain

agar ye dil ho ki suraj ki dhup saya bane

to apne nam ke paude lagaya karte hain

jinhen likha ho kisi ne baDi mohabbat se

baDe adab se wo name jalaya karte hain

wo jin ke dam se gulon par nikhaar aata ho

bahaar aae to un ko bulaya karte hain

samajh lo baat chhupaenge jhuT bolenge

jo baat karte hue sar khujaya karte hain

na dekh pana alag sa baDhawa deta hai

charagh wasl se pahle bujhaya karte hain

mere aziz ai 'danish-aziz’ baat samajh

jinhen ho zoam unhen aazmaya karte hain