dhaDkan mein dil ki KHud ko jo tashkil kar gaya

dhaḌkan meñ dil kī ḳhud ko jo tashkīl kar gayā

har zāviya nigāh kā tabdīl kar gayā

mere baġhair jis ko thā jiinā muhāl kyoñ

tanhā masāfatoñ kī vo takmīl kar gayā

jis ko masarratoñ kī duā.eñ diiñ umr bhar

dukh kī kitāb vo mujhe tarsīl kar gayā

dasht-e-vafā meñ paañv ke chhāloñ kā kyā shumār

thā azm sañglāḳh ko tahlīl kar gayā

sochā thā apne dil kā bhī ahvāl kuchh kaheñ

chehra bayān dard kī tafsīl kar gayā

guzrā hai haq ke vāste dār-o-rasan se jo

jhūTe ḳhudāoñ kī vahī tazlīl kar gayā

manzar kuchh aise ḳhūñ-chakāñ aa.e nigāh meñ

jaise ki dard ko koī tamsīl kar gayā

dhaDkan mein dil ki KHud ko jo tashkil kar gaya

har zawiya nigah ka tabdil kar gaya

mere baghair jis ko tha jina muhaal kyon

tanha masafaton ki wo takmil kar gaya

jis ko masarraton ki duaen din umr bhar

dukh ki kitab wo mujhe tarsil kar gaya

dasht-e-wafa mein panw ke chhaalon ka kya shumar

tha azm sanglaKH ko tahlil kar gaya

socha tha apne dil ka bhi ahwal kuchh kahen

chehra bayan dard ki tafsil kar gaya

guzra hai haq ke waste dar-o-rasan se jo

jhuTe KHudaon ki wahi tazlil kar gaya

manzar kuchh aise KHun-chakan aae nigah mein

jaise ki dard ko koi tamsil kar gaya