dhaDkan mein nihan ishq ke aazar se pahle

dhaḌkan meñ nihāñ ishq ke āzār se pahle

ik aur hasīñ ġham hai ġham-e-yār se pahle

fitrat kī tamannā kā jo darpan haiñ vo naġhme

gaatī haiñ havā.eñ dil-e-fankār se pahle

mausam ne to bādal ke abhī bāñdhe haiñ ghuñghrū

dil jhuum uThā hai mirā jhankār se pahle

ham apne ḳhayāloñ meñ the kuchh bhī nahīñ samjhe

maujoñ meñ to halchal sī thī mañjdhār se pahle

sochā hī thā sajde meñ jhukeñ ḳhud mirī āñkheñ

irfān-e-ḳhudā ho gayā dīdār se pahle

gar aap ko tārīḳh samajhnī hai hamārī

shāḳh-e-gul-e-tar dekhiye talvār se pahle

bādal bhī banāne kā hunar siikh lo 'asrār'

sahrā bhī milegā rah-e-dil-dār se pahle

dhaDkan mein nihan ishq ke aazar se pahle

ek aur hasin gham hai gham-e-yar se pahle

fitrat ki tamanna ka jo darpan hain wo naghme

gati hain hawaen dil-e-fankar se pahle

mausam ne to baadal ke abhi bandhe hain ghunghru

dil jhum uTha hai mera jhankar se pahle

hum apne KHayalon mein the kuchh bhi nahin samjhe

maujon mein to halchal si thi manjdhaar se pahle

socha hi tha sajde mein jhuken KHud meri aankhen

irfan-e-KHuda ho gaya didar se pahle

gar aap ko tariKH samajhni hai hamari

shaKH-e-gul-e-tar dekhiye talwar se pahle

baadal bhi banane ka hunar sikh lo 'asrar'

sahra bhi milega rah-e-dil-dar se pahle