dhaDkan sa koi dil mein siwa bol raha hai

dhaḌkan sā koī dil meñ sivā bol rahā hai

is saaz meñ ḳhud naġhma-sarā bol rahā hai

khultā hī nahīñ terā tilism-e-lab-o-lahja

kyā jāniye ḳhāmosh hai yā bol rahā hai

har shaḳhs nahīñ daar kā shā.ista vagarna

har shaḳhs ke parde meñ ḳhudā bol rahā hai

ye lafz ki chaḌh kar huā thā guñg zabāñ par

kāġhaz par utārā hai to kyā bol rahā hai

ye vo hī parinda hai ki sādhe hue chup thā

is tarah jo ab ho ke rihā bol rahā hai

ik aur bhī shah-zor se kal ham ne sunā thā

tū aaj ye jo bol baḌā bol rahā hai

'shaukat' hai payāpe jo ravāñ qāfila dam kā

dil sūrat-e-āvāz-e-darā bol rahā hai

dhaDkan sa koi dil mein siwa bol raha hai

is saz mein KHud naghma-sara bol raha hai

khulta hi nahin tera tilism-e-lab-o-lahja

kya jaaniye KHamosh hai ya bol raha hai

har shaKHs nahin dar ka shaista wagarna

har shaKHs ke parde mein KHuda bol raha hai

ye lafz ki chaDh kar hua tha gung zaban par

kaghaz par utara hai to kya bol raha hai

ye wo hi parinda hai ki sadhe hue chup tha

is tarah jo ab ho ke riha bol raha hai

ek aur bhi shah-zor se kal hum ne suna tha

tu aaj ye jo bol baDa bol raha hai

'shaukat' hai payape jo rawan qafila dam ka

dil surat-e-awaz-e-dara bol raha hai